Batys Qazaqstanda erekshe balalarǵa arnalǵan ortalyq iske qosyldy
Jańa ortalyq mamandary neıro-ortopedııalyq kinárattary men olardyń týyndaý qaýpi bar balalarǵa kómektesetin bolady. Mekeme eń zamanýı jabdyqtarmen jabdyqtalǵan, jylyna densaýlyǵynda kináraty bar 3 jasqa deıingi 600 balany qamtı alady, dep habarlaıdy Kazinform.
Erte aralasý ortalyǵynda tserebraldy sal aýrýy, shala týý, Daýn sındromy, damýynda týa bitken aqaýlary, bulshyq et dıstrofııasy, bosaný jaraqattary jáne qozǵalys buzylystary jáne júıke júıesiniń basqa da aýrýlary bar balalar ońaltýdan ótedi.
Balalarmen jumys isteý úshin tıimdi tehnologııa usynylǵan, olar: mehanoterapııa jáne emdik-dene shynyqtyrý zaly, sensorlyq, ımmersııalyq vanna, shýngıt jáne tuz bólmeleri.
Estý qabiletin jáne mıdy zertteýge arnalǵan dıagnostıkalyq jabdyqtar da bar.
«Biz búgin Qazaqstan boıynsha erekshe balalar jáne olardyń ata-analary úshin 34-shi ońaltý ortalyǵyn ashyp otyrmyz. Erte aralasý ońaltý ortalyqtarynyń artyqshylyǵy — densaýlyǵynda kániraty bar balalarǵa abılıtatsııalyq ońaltý arqyly múgedektiginiń aldyn alýǵa kómek berý. Bul maqsatta dárigerlermen birlesken eńbektiń jemisin ata-analar qaýymy laıyqty baǵalaıdy dep senemin. Al bizdiń ulttyq ál-aýqat qory ınklıýzıvti qoǵamdy damytýǵa baǵyttalǵan ıgilikti isin ári qaraı da jalǵastyra beredi», — dep atap ótti «Samuryq-Qazyna» AQ korporatıvtik basqarý, áleýmettik-eńbek qatynastary jáne eńbekti qorǵaý jónindegi basqarýshy dırektory Ǵıbrat Aýǵanov.
Jańa ortalyq «Samuryq-Qazyna» jáne «Qazaqstan halqyna» qorlarynyń yntymaqtastyǵy aıasynda ashylyp otyr.
