Batys Qazaqstanda elektromobılder kóbeıdi me
ORAL. KAZINFORM — Batys Qazaqstan oblysynda elektromobılder sany qansha, bul kólikter turǵyndar úshin qoljetimdi me, mine, osyny Kazinform tilshisi anyqtap kórdi.
Oralda bir ǵana elektrmen zarıadtaý stantsııasy bar
BQO energetıka, turǵyn úı-kommýnaldyq sharýashylyq basqarmasy basshysynyń orynbasary Beıimbet Mýsınniń málim etkenindeı, QR Prezıdentiniń 2022 jylǵy 26 qarashadaǵy № 2 Jarlyǵynda 2029 jylǵa qaraı elimizdiń barlyq iri qalalarynda elektromobılder úshin qajetti ınfraqurylym qurý kózdelgen. Bul bastama ekologııalyq taza kólikter sanynyń artýyna jáne qorshaǵan ortaǵa zııandy shyǵaryndylardy azaıtýǵa baǵyttalǵan.
Onyń sózine qaraǵanda, statıstıkalyq derekterge sáıkes Qazaqstanda elektr qozǵaltqyshtary bar 11 706 avtokólik tirkelgen. Bul elektr qozǵaltqyshtary bar kólik túriniń sany ósip kele jatqanyn kórsetedi. Sonymen birge elimizde 425 elektr zarıadtaý stantsııasy (EZS) jumys isteıdi. Zarıadtaý stantsııalarynyń eń kóbi Almatyda (314), odan keıin Astanada (21), Shymkentte (11).
— EZS-tiń taralýy elimizdiń ár aımaǵynda teńdeı bólinbegen, bul kórsetkish basqa qalalarda áldeqaıda az. Bul jaǵdaı elektromobılderdi keńinen paıdalaný úshin qajetti ınfraqurylymdy jetildirý qajettigin kórsetedi. Qazirgi tańda jergilikti atqarýshy organdarmen elektr zarıadtaý stantsııalarynyń sanyn kóbeıtý jáne olardyń jumysyn tıimdi uıymdastyrý maqsatynda tehnıkalyq sharttar alý jáne qosymsha 196 EZS ornatý máseleleri pysyqtalýda. Budan, árıne, Batys Qazaqstan oblysy da tys qalmaıdy, — deıdi B.Mýsın.
Onyń aıtýynsha, QR Premer-mınıstriniń birinshi orynbasary Roman Sklıardyń tapsyrmasymen bekitilgen jol kartasy aıasynda elektr zarıadtaý stantsııasy oryndary jol boıynda jáne avtovokzaldar aýmaǵynda ornalastyrylyp, olardyń tıimdi qyzmet kórsetýi qamtamasyz etilmek. Elektr qozǵaltqyshtarynyń órt qaýipsizdigin saqtaý úshin arnaıy talaptar engiziledi. EZS-tiń durys jumys isteýine baǵyttalǵan tehnıkalyq standarttar men reglamentter ázirlenedi. Elektromobılderdiń akkýmýlıatorlyq batareıalarynyń ekologııalyq qaýipsizdigin qamtamasyz etý máselesi de qarastyrylady.
Batys Qazaqstanda elektr qozǵaltqyshy bar 66 kólik tirkelgen
Batys Qazaqstan oblysy polıtsııa departamentiniń málimetine sáıkes óńirde qazirgi ýaqytta elektr qozǵaltqyshy bar 66 kólik tirkelgen.
— 2020-2024 jyldar aralyǵynda qalada satyp alynǵan elektr kólikteriniń arasynda eń kóp taralǵan markalar tómendegideı: Zeekr — 21, Lixiang — 11, Tesla — 8, Volkswagen — 7, BYD — 5 dana. Qalǵan elektr kólikteri ártúrli markalar, bul elektromobılder naryǵynyń ártúrli brendtermen tolyqtyrylyp, tutynýshylardyń tańdaýynyń keńeıgenin kórsetedi, — deıdi Beıimbet Mýsın.
Statıstıkalyq málimet boıynsha Batys Qazaqstan oblysynda 2021 jyly 4 dana, 2022 jyly 18, 2023 jyly 28, al 2024 jyly tek 12 dana elektrokólik esepke alynǵan.
— Kúni búgin Oral qalasynda bir ǵana elektr zarıadtaý stantsııasy M.Sholohov kóshesi 39 mekenjaıynda ornalasqan. Bul stantsııadaǵy zarıadtaý quny — 1 kVt úshin 85 teńge. Ortasha eseppen alǵanda, elektr kólikteriniń energııa shyǵyny — 100 km jolǵa 20 kVt/saǵ. Demek, bir kılometrdi júrip ótý quny — nebári 17 teńge. Aldaǵy ýaqytta oblys ortalyǵynda osyndaı stantsııalardy kóbeıtý oılastyrylýda, — deıdi basqarma basshysynyń orynbasary.
Kólik ıesi ne deıdi?
Elektromobıldi paıdalanyp júrgen turǵyndardyń biri, «Batys Qazaqstan aımaqtyq elektr jelilik kompanııasy» JShS qyzmetkeri Mırjan Nysanov bul kólikti qoldaný tıimdi ekendigin jetkizdi. Ol Lixiang kóligin Qytaıdan tapsyryspen aldyrǵan.
— Mundaı kólikke árkim óz jaǵdaıyna qaraı qol jetkize alady dep oılaımyn. Qalada bir elektr zarıadtaý stantsııasy bar deıdi. Men ózimniń qýaty az qurylǵymmen zarıadtaımyn. Túnde qoıǵanda, tańǵa deıin zarıadtalyp turady. Elektromobıldiń artyqshylyǵy, ony qyzdyryp jatpaısyń, otyrasyń da, júre beresiń. Ekinshiden, qalanyń ishinde yńǵaıly. Qorshaǵan ortaǵa zııany joq. Endi alys saparlarǵa shyqqanda, meniń kóligim gıbrıd, akkýmýlıatordy zarıadtap alyp, benzınmen de júremin. Benzınge aýystyrǵanda, ózin-ózi zarıadtaıdy. Sodan keıin qaıtadan elektrmen júrýge bolady, — deıdi M.Nysanov.
Eske sala keteıik, budan buryn Oralda avtogaz birde bar, birde joq ekendigin jazǵan bolatynbyz.