Batys Qazaqstanda elektr jelileri úzilip, joldar jabyldy
Batys Qazaqstan oblysynda elektr jelileri úzilip, joldar jabyldy, dep habarlaıdy Kazinform.
BQO TJ departamentiniń baspasóz qyzmetinen málim etkenindeı, 22 qarasha kúngi saǵat 22.00-degi málimet boıynsha Oral qalasy men oblystyń alty aýdanynda kúshti jelden elektr jelileri úzildi.
Sonyń saldarynan 1 229 abonent, sonyń ishinde 14 áleýmettik nysan elektr jaryǵynsyz qaldy.
«Oral qalasynda Kýrenı aýdanynda 220 abonent, Jańaqala aýdany Jańaqazan aýylynda 512 abonent, sonyń ishinde 1 áleýmettik nysan, Tasqala aýdanynda 5 eldi mekende 264 abonent (5 áleýmettik nysan) jaryqsyz otyr. Sondaı-aq Aqjaıyq aýdanynda 3 eldi mekende 112 abonent (3 áleýmettik nysan), Báıterek aýdanynda 3 aýylda 53 abonent (3 áleýmettik nysan), Kaztalov aýdany Bozoba aýylynda 50 abonent (1 áleýmettik nysan), Terekti aýdany Rybtseh eldi mekeninde 18 abonent (1 áleýmettik nysan) osyndaı kúıge ushyrady. «Batys Qazaqstan elektr jelilerin taratý kompanııasy»» JShS kúshimen (40 qyzmetker, 12 tehnıka) qalpyna keltirý jumystary júrgizilýde», - dep habarlady vedomstvodan.
Departamentten túsken málimetke qaraǵanda, qazirgi ýaqytta oblys boıynsha 9 baǵyt boıynsha joldar jabyq. Taǵy bir jolda avtokólik qozǵalysy shekteldi.
«Qazgıdromet» RMK málimetine sáıkes 23 qarasha kúni de soltústik-batystan soqqan jeldiń ekpini sekýndyna 15-20 metrge jetpekshi. Oblystyń soltústigi men shyǵysynda burqasyn kóterilse, batysynda tuman túsýi yqtımal.
Osyǵan baılanysty BQO TJ departamenti aýa raıynyń qolaısyz kezinde turǵyndardyń eldi mekenderden alys jerlerge shyqpaýy qajettigin eske salady.
Eske sala keteıik, budan buryn Oralda aýa raıyna baılanysty ushaqtar ushpaı jatyrǵanyn jazǵan bolatynbyz.
