Batys Qazaqstanda ekologııa salasynda 115 zań buzýshylyq anyqtaldy
ORAL. KAZINFORM — Batys Qazaqstan oblysynda bıylǵy birinshi jartyjyldyqta ekologııa departamentiniń ınspektorlary 39 kásiporyn men uıymda memlekettik baqylaý is-sharalaryn júrgizdi.
BQO boıynsha ekologııa departamentiniń basshysy Murat Ermekqalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, sonyń 14-i — jospardan tys tekserý, 16-sy — profılaktıkalyq baqylaý. Sondaı-aq biliktilik talaptaryna sáıkestigi boıynsha 9 tekserý ótkizildi.
Murat Ermekqalıevtiń sózine qaraǵanda, tekserý nátıjesinde ekologııalyq zańnama talaptarynyń 115 buzýshylyǵy anyqtaldy. Bulardy joıý maqsatynda 61 nusqama berilip, onyń 33-i oryndaldy. Qalǵan 28 nusqamanyń oryndalý merzimi aıaqtalmaǵandyqtan, olar turaqty baqylaýda.
— Alty aıda jalpy somasy 2,081 mlrd teńgege 22 ákimshilik aıyppul salý týraly qaýly shyǵaryldy. Onyń ishinde 2,065 mlrd teńge jergilikti bıýdjet kirisine óndirildi. Aıtalyq, osy jyldyń 3–16 aqpan aralyǵynda «QPO b. v.» kompanııasyna jospardan tys tekserý júrgizildi. Tekserý nátıjesinde kásiporyn Ákimshilik quqyq buzýshylyq týraly kodeksiniń 328-babynyń 1 jáne 2-bólikteri boıynsha, ıaǵnı ekologııalyq ruqsatta belgilengen qorshaǵan ortaǵa emıssııalar normatıvterinen asqany úshin ákimshilik jaýapkershilikke tartyldy. Jalpy somasy 2 mlrd teńgeden astam aıyppul salynyp, tolyq kólemde memleket kirisine óndirildi, — deıdi Murat Ermekqalıev.
Onyń aıtýynsha, 22 ákimshilik istiń kópshiligi Ákimshilik quqyq buzýshylyq týraly kodeksiniń 344-baby (qaldyqtardy basqarý jónindegi ekologııalyq talaptardy buzý) boıynsha tirkeldi. Osy bap boıynsha 7 ákimshilik is qozǵalyp, 1,5 mln teńge aıyppul tolyq óndirildi.
Sonymen qatar Kodekstiń 328-babyna (qorshaǵan ortaǵa jol beriletin antropogendik áser etý normatıvterin buzý) sáıkes 3 ákimshilik is qaralyp, 2 mlrd teńgeden astam aıyppul memleket kirisine óndirildi.
Departament málimetine sáıkes bıylǵy birinshi jartyjyldyqta atmosferalyq aýaǵa 33,4 myń tonna lastaýshy zattar shyǵaryldy, bul byltyrǵy osy kezeńmen (45,9 myń tonna) salystyrǵanda, 12,5 myń tonnaǵa (27,3 paıyz) az.
Shyǵaryndylardyń azaıýy negizinen ekinshi sanattaǵy kásiporyndarǵa baılanysty, bularǵa ekologııalyq ruqsatty jergilikti atqarýshy organdar beredi. Atap aıtqanda, «Oral» magıstraldyq gaz qubyrlary basqarmasy jóndeý jumystary kezinde tabıǵı gazdy aıdaý kóleminiń qysqarýyna baılanysty shyǵaryndyny 17,8 myń tonnaǵa qysqartqan.
— BQO-daǵy atmosferalyq aýaǵa shyǵarylatyn barlyq zııandy zattardyń 48,5 paıyzy (16,04 myń tonna) munaı-gaz kásiporyndaryna tıesili, sonyń ishinde «QPO b. v.» — 8,7 paıyz, «Jaıyqmunaı» JShS — 5,2 paıyz, «Kondensat» AQ — 3,5 paıyz, sondaı-aq «Oral» magıstraldyq gaz qubyrlary basqarmasy — 31 paıyz. Birinshi jartyjyldyqta oblysta atmosferanyń joǵary jáne ekstremaldy lastaný derekteri tirkelgen joq, — dep qosty Murat Ermekqalıev.
Eske sala keteıik, budan buryn BQO-da munaı óndirýshi kompanııaǵa 2 mlrd astam teńge aıyppul salynǵanyn jazǵan edik.
