Batys Qazaqstanda burynǵy aýdan ákimi bostandyqqa shyqty

ORAL. KAZINFORM – Batys Qazaqstan oblysynda 11 jylǵa sottalǵan Terekti aýdanynyń burynǵy ákimi Jeńis Serikqalıev merziminen buryn bostandyqqa shyqty.

Óz kóńildesin óltirýge tapsyrys bergen J.Serikqalıev BQO qylmystyq ister jónindegi mamandandandyrylǵan aýdanaralyq sotynyń 2016 jylǵy 1 qyrkúıektegi úkimimen QR QK 28-baby 3-bóligi, 24-baby 3-bóligi, 99-baby 2-bóligi 7-8-tarmaqtarymen, 54-baby 3-bóligi, 55-baby 2-bóligi qoldanylyp, 11 jyl merzimge bas bostandyǵynan aıyrylǵan bolatyn. Jaza merziminiń aıaqtalýy 2027 jyldyń 4 naýryzy bolyp belgilengen.

J.Serikqalıev densaýlyq jaǵdaıyna baılanysty Oral qalalyq sotyna jazany óteýden shartty túrde merziminen bosatý týraly ótinishhat bergen.

BQO sotynan túsken málimetke qaraǵanda, sottalýshy jazasyn óteý kezinde ózin jaqsy jaǵynan kórsetken. Mekemeniń ishki tártip qaǵıdalaryn saqtap, is-sharalarǵa belsene qatysqan. Eńbekke aralasyp, qosymsha gazben dánekerleý mamandyǵy boıynsha kásiptik bilim alǵan. 15 ret madaqtaý qaǵazyn alyp, oǵan qatysty jazalaý sharasy qoldanylmaǵan.

Sot otyrysynda jábirlenýshi J.Serikqalıevti jazasyn óteýden shartty túrde merziminen bosatýǵa qarsy emestigin bildirdi.

Іstiń mán-jaıyn qaraı kelip, sot J.Serikqalıevtiń densaýlyq jaǵdaıyn da eskere otyryp, onyń ótinishin qanaǵattandyrdy. Jazanyń qalǵan bóligi – 2 jyl 11 aı 3 kún shartty túrde óteletin bolady.

Qaýly sáýir aıynda shyqqanymen, qazir belgili bolyp otyr.

Eske sala keteıik, budan buryn Oralda qalalyq sot tóraǵasy paramen ustalǵanyn jazǵan bolatynbyz.