Batys Qazaqstanda birinshi synypqa 12 myńǵa jýyq oqýshy qabyldanady
ORAL. KAZINFORM — Batys Qazaqstan oblysynda bilim berý uıymdaryna birinshi synypqa qabyldaý 1 sáýirden 31 tamyzǵa deıin jalǵasady.
BQO bilim basqarmasynan málim etkenindeı, 2025-2026 oqý jylyna boljam boıynsha 1 synypqa 12 myńǵa jýyq oqýshy alynbaqshy.
Qazirgi tańda 9 997 bala mektepterge qabyldansa, sonyń 7 648-i qazaq, 2 349-y orys tilinde bilim alýǵa nıet bildirdi.
— Ótinishter www.egov.kz «elektrondyq úkimet» veb-portaly arqyly jáne qaǵaz nusqada bilim berý uıymdary arqyly (demalys jáne mereke kúnderin qospaǵanda, dúısenbiden bastap jumany qosa alǵanda) qabyldanady. Ata-analardyń nemese zańdy ókilderdiń ótinishi, № 065/ý nysandy «Profılaktıkalyq ekpeler kartasy» jáne № 052-2/ý nysandy «Bala densaýlyǵynyń pasporty», balanyń 3×4 sm ólshemindegi 2 dana fotosýreti usynylady. Bilim berý uıymdary daıyndyq deńgeıine qaramastan, qyzmet kórsetetin aýmaqta turatyn balalardyń qoljetimdiligin qamtamasyz ete otyryp, alty jastaǵy jáne kúntizbelik jylda alty jasqa tolatyn balalardy birinshi synypqa qabyldaýdy qamtamasyz etedi. Qyzmet etý aýmaǵy qalalardyń, aýdandardyń bilim berýdi basqarý organdarynyń buıryǵymen bekitiledi, — deıdi basqarma mamandary.
Basqarmadan túsken málimetke qaraǵanda, QR Oqý-aǵartý mınıstrliginiń 2023 jylǵy 17 qarashadaǵy № 341 jáne Tsıfrlyq damý, ınnovatsııalar jáne aeroǵarysh ónerkásibi mınıstrliginiń 2023 jylǵy 17 qarashadaǵy № 556 birlesken buıryǵy negizinde «Jalpy bilim beretin mektepterdegi bilim alýshylar men tárbıelenýshilerdiń jekelegen sanattaryn tegin jáne jeńildikpen tamaqtandyrýdy usyný» memlekettik qyzmetin iske asyrý maqsatynda oblys boıynsha 365 memlekettik mektepterdiń ishinen 93-inde (aýdan ortalyqtarynda, qalada ornalasqan) apparattyq-baǵdarlamalyq keshender ornatyldy.
Bul mektepterde 4 ónim jetkizýshi bar: 22 mektepte «Otan-mektep», 11-inde «Alaqan», altaýynda «Qazbilim», 54-sinde «E-Ashana». Qazirgi tańda qondyrylǵan apparattyq-baǵdarlamalyq keshenderdiń «Áleýmettik ámııan» aqparattyq júıesimen ıntegratsııa jumystary 100 paıyz aıaqtaldy.
Sonymen qatar jergilikti bıýdjet esebinen 1 mlrd 998 mln teńgege 644 401 dana oqýlyq satyp alyndy. Kúni búginge deıin bilim basqarmasy 9 baspamen kelisim-shart jasasqan. Oqýlyqtar 25 tamyzǵa deıin jetkiziledi.
Eske sala keteıik, budan buryn Oralda salynyp jatqan jaıly mektep qurylysy nelikten kesheýildegenin jazǵan edik.