Batys Qazaqstanda birqatar pánder boıynsha muǵalimder jetispeıdi
ORAL. KAZINFORM — Batys Qazaqstan oblysy mektepterinde jańa oqý jylyna oraı matematıka jáne hımııa páni muǵalimderine tapshylyq baıqalady.
BQO bilim basqarmasy basshysynyń orynbasary Aqjarqyn Temirhanovanyń óńirlik kommýnıkatsııalar qyzmeti alańynda ótken brıfıngte málim etkenindeı, qazaq tilinde sabaq beretin mektepterde bul másele sheshildi deýge bolady.
Onyń sózine qaraǵanda, sabaq orys tilinde júrgiziletin bilim ordalaryndaǵy kadr jetispeýshiligi saǵat júktemesin kóbeıtý arqyly sheshilýde.
Bilim basqarmasynyń málimeti boıynsha matematıka, hımııa pánderin daıyndaýǵa jyl saıyn oblystyq bıýdjet qarajaty esebinen bilim granttary beriledi. Sonymen qatar jergilikti joǵary oqý oryndary túlekterimen toqsan saıyn bos oryndar boıynsha jármeńkeler ótkiziledi.
- Oblysta barlyǵy 382 mektepte 128 myńnan astam oqýshy bilim almaqshy. Bıyl 1 synypqa 11 190 bala qabyldansa, sonyń 77 paıyzy qazaq tilinde oqıdy. Qabyldaý 31 tamyzǵa deıin jalǵasady. Jańa oqý jyly qarsańynda jergilikti bıýdjet esebinen jalpyǵa birdeı bilim berý qorynan 416 mln teńge qarastyrylyp, ár balaǵa 50 581 teńgeden ata-ananyń esep-shottaryna aýdaryldy, - dedi A.Temirhanova.
Oǵan qosa «Mektepke jol» dástúrli is-sharasy aıasynda az qamtylǵan jáne kópbalaly otbasylardan shyqqan, jetim jáne ata-anasynyń qamqorlyǵynsyz qalǵan balalarǵa mektep formasyn, aıaqkıim men oqý quraldaryn alýǵa kómek kórsetilýde. 1 tamyzdan beri 978 balaǵa 11,2 mln teńge kóleminde keńse taýarlary, kıim keshek, qarjylaı demeýshilik járdem berildi.
«Qarashyǵanaq Petrolıým Opereıtıng b.v» kompanııasynyń áleýmettik jobalary aıasynda boı kótergen 8 shaǵyn jınaqty mektep qurylysy jańa oqý jylyna deıin aıaqtalady. Bul bilim nysandarynyń jalpy syıymdylyǵy 624 oqýshy orynǵa eseptelgen. Osy 8 nysan qurylysyna 11,75 mlrd teńge qarastyryldy.
Eske sala keteıik, budan buryn BQO-da sanıtarııalyq buzýshylyqtar boıynsha bilim mekemelerine 360-tan astam uıǵarym berilgenin jazǵan edik.
Ǵaısaǵalı Seıtaq
https://kaz.inform.kz/news/bko-da-sanitariyalik-buzushiliktar-boyinsha-blm-mekemelerne-360-tan-astam-uygari-4b4bd6b8/
