Batys Qazaqstanda boranǵa baılanysty eki respýblıkalyq jolda qozǵalys shekteldi

Batys Qazaqstan oblysynda boranǵa baılanysty eki respýblıkalyq jolda qozǵalys shekteldi, dep habarlaıdy Kazinform.

«QazAvtoJol» UK» AQ BQO fılıalynyń málimeti boıynsha 11 qańtar kúni jergilikti saǵat 19.10-nan bastap respýblıkalyq mańyzy bar Kaztalov-Jánibek-RF shekarasy joly (0-158 km, Kaztalovtan Jánibekke deıin) barlyq kólik túrleri úshin jabyldy.

Sol sekildi saǵat 20.30-dan bastap Oral-Tasqala-RF shekarasy jolynda da (4-104 km, Oral qalasynan Reseı shekarasyna deıin) osyndaı shara qoldanyldy.

Sonymen qatar respýblıkalyq mańyzy bar Chapaev-Jalpaqtal-Kaztalov jáne Ónege-Bısen-Saıqyn jol bólikteri de jabyldy.

Jabylý sebebi – boran, joldyń durys kórinbeýi.

BQO TJ departamentiniń baspasóz qyzmeti 12 qańtardaǵy aýa raıyna baılanysty da eskertý jarııalanǵanyn jetkizdi.

«Juma kúni kúndiz oblystyń soltústik-shyǵysynda qar qalyń jaýmaq. Keıbir jerlerde burqasyn kóterilip, tuman túsip, kóktaıǵaq bolýy yqtımal. Jeldiń ekpini sekýndyna 15-20 metrge deıin jetedi. Oral qalasynda jaıaý burqasyn bolyp, jeldiń jyldamdyǵy sekýndyna 18 metrge deıin jetýi múmkin. Osyǵan oraı BQO TJ departamenti turǵyndarǵa aýa raıynyń qolaısyz kúnderi alys jolǵa shyqpaý kerektigin eske salady», dep habarlady vedomstvodan.

Eske sala keteıik, budan buryn Batys Qazaqstanda aýa raıyna baılanysty respýblıkalyq jol jabylǵanyn jazǵan bolatynbyz.

Sondaı-aq BQO-da on kúnde jol apatynan 12 adam qaza tapty.