Batys Qazaqstanda báıge úzdikteri marapattaldy
Oral qalasynda BQO «Báıge» federatsııasy jyldy qorytyndylap, úzdikter marapattaldy, dep habarlaıdy Kazinform.
Іs-sharada federatsııa prezıdenti Satqalı Baızýllın jyl boıy báıgelerde baby men baǵy kelisti bolyp, alamannyń aldyn bermegen júırikter men ıelerin, bapkerlerin jáne shabandozdaryn, sondaı-aq báıge sportynyń janashyrlaryn marapattaý ıgi dástúrge aınalǵanyn atap ótti.
Onyń sózine qaraǵanda, osy jylǵy tabys-jetistikter az emes. Atap aıtqanda, batys júırikteri elimizdegi aıtýly báıgelerge qatysyp, úzdik nátıjelerge qol jetkizgen. Sonymen qatar kórshiles Bashqurt respýblıkasyndaǵy ulttyq festıvalge barǵan shabandozdar alamannyń aldynan kóringen eken. Bıyl oblys basshylyǵynyń qoldaýymen Ulttyq sport mektebi janynan «Báıge» bólimi ashylyp, qazirgi tańda 30 bala jattyǵyp júr. Satqalı Demesinuly osylaısha ulttyq sportty ulyqtap, batys ólkesinde báıgeni damytýǵa úles qosyp júrgenderge alǵysyn bildirdi. Sporttyń atalmysh túrin kásibı turǵyda damytý jumystary ári qaraı jalǵasa beretinin jetkizdi. Keıin osy jyly báıge uıymdastyrýǵa erekshe úles qosqan Terekti, Bórli, Tasqala, Qaratóbe, Shyńǵyrlaý, Jańaqala, Kaztalov, Aqjaıyq aýdandary ákimdikterine, báıge janashyrlary men demeýshilerine alǵyshattar usyndy.
Oral qalalyq sport bóliminiń basshysy Armat Isanov elimizdiń kórnekti, resmı báıgelerinde shaýyp, óziniń kásibı biliktiligin kórsetken shabandozdarǵa sporttyq dáreje kýálikterin tabystady. Olardyń ishinde Mırazat Aısultan, Boranbaı Ábdýrahman, Aıbolat Saıan, Serikbaı Saıat báıge sportynan «Sport sheberligine úmitker» dep tanylsa, terektilik Bekenov Álıhan «І razrıadty sportshy» atandy.
Sahnada sóz alǵan respýblıkalyq federatsııanyń vıtse-prezıdenti Almas Sapashev batys atbegilerin jetistikterimen quttyqtap, ulttyq sporttyń damýyna sińirgen eńbegi úshin kaztalovtyq belgili atbegi Nurbolat Ádıetov pen Armat Isanovtyń óńirine «Sáıgúlik» medalin taqty.
Іs-shara barysynda osy jyldyń júırikterin baptaǵan bapkerler marapattaldy. Olardyń ishinde batystyń bas báıgesine aınalǵan «Jaıyq júıriginde» óńir namysyn qorǵaǵan «Sılvııa» atty arǵymaqtyń bapkeri Serik Júndibaev, «Nazkúreń» atty tulpardy daıyndaǵan Elaman Bektemiruly, «Sultan» nyspyly sáıgúlikti baptaǵan Ernur Nurjanuly bar. Sol sekildi alamannyń aldynan birneshe márte kóringen «Aqbastaýdyń» babyn kelistirgen Bekzat Sabyrǵalıuly, baby men baǵy qatar shapqan «Toqtamas» pen «Qarlyǵashtyń» bapkeri Nurqanat Ǵarıfollauly, «Nurtóbel» atty qoltýma taıy «Jaıyq júıriginde» máre syzyǵyn birinshi bolyp kesken Asylbek Abatuly ataýsyz qalmady. “2023 jyldyń úzdik arǵymaǵy» bolyp «Jańabaevtar» sharýa qojalyǵynyń «Sılvııa» tulpary tanyldy.
Sonymen qatar osy jyly úzdikterdi taqymdaǵan jıyrma eki shabandozdyń esimi erekshe ataldy. Olardyń qatarynda bıyl úsh birdeı avtokólikti utqan júırikterge shapqan Erkesh Ýsan, syrymdyq Yrysbek Myrzabekuly, aqjaıyqtyq Erjigit Vıtalııuly, oraldyq Álı Erkebaıuly, Nurıslam Nurlybekuly bar.