Batys Qazaqstanda báýkespe ury avtokólik ıelerine 5 mln teńge shyǵyn keltirgen

ORAL. KAZINFORM — Batys Qazaqstan oblysynda krımınaldyq polıtsııa qyzmetkerleri Oral qalasynyń 34 jastaǵy turǵynyn qolǵa túsirdi.

BQO polıtsııa departamentiniń baspasóz qyzmetinen málim etkenindeı, atalmysh turǵyn qala aýmaǵynda avtokólikterden urlyq jasaýmen aınalysqan.

Tergeý barysynda kúdiktiniń túngi ýaqytta avtoturaqtarda turǵan avtokólikterdiń terezelerin syndyryp, ishindegi beınetirkegishter men jeke zattardy urlaǵany anyqtaldy. 

— Onyń shilde jáne tamyz aılarynda Oral qalasynda 11 urlyq jasaǵany belgili boldy. Avtokólik ıelerine keltirilgen jalpy shyǵyn 5 mıllıon teńgeden asty. Urlyq derekteri boıynsha kúdiktige qatysty tergeý amaldary júrgizildi. Qazirgi ýaqytta tergeý aıaqtalyp, qylmystyq is sotqa joldandy, — dep habarlady vedomstvodan.

Eske sala keteıik, budan buryn BQO-da polıtsııa 10 adamdy san soqtyrǵan kúdiktini quryqtaǵanyn jazǵan edik.