Batys Qazaqstanda barlyq egis kólemi 626 myń gektar bolmaq

ORAL. KAZINFORM – Batys Qazaqstan oblysynda egis qurylymyn ártaraptandyrý arqyly aýyl sharýashylyǵy daqyldary bıyl 626 myń gektarǵa egilmek.

BQO aýyl sharýashylyǵy basqarmasynyń basshysy Jasulan Halıýllınniń málim etkenindeı, sonyń 293 myń gektary dándi daqyldar (93 myńy – kúzdik, 200 myńy – jazdyq bıdaı) bolmaq.

Onyń sózine qaraǵanda, sondaı-aq 123 myń gektarǵa (52 myńy – kúnbaǵys, 71 myńy – maqsary jáne basqalary) maıly daqyldar sebilmek. 4 300 gektarǵa kartop, kókónis-baqsha daqyldary otyrǵyzylady. Mal azyqtyq daqyldardyń kólemi – 205 myń gektar (birjyldyq shópter – 19 myń ga, súrlemdik daqyldar – 1,7 myń ga, kópjyldyq shópter – 33 myń ga jáne ótken jyldardan qalǵan kópjyldyq shópter 151 myń ga).

- Osy jospar údesinen shyǵý úshin tyńaıtqyshtar kólemin 60 900 tonnaǵa deıin arttyrý, aýyl sharýashylyǵy tehnıkalarynyń parkin 8 paıyzǵa jańartý, elıtalyq tuqymdardyń úlesin 6,2 paıyzǵa deıin jetkizý, sondaı-aq sýarmaly jerlerdiń alqabyn 12,1 myń gektarǵa deıin ulǵaıtý kózdelip otyr. Bıyl óńirge kóktemgi dala jumystaryn qarjylandyrýǵa 15,5 mlrd teńge qaraldy. Sonyń ishinde ósimdik sharýashylyǵyn sýbsıdııalaý baǵdarlamalary men qyzmetter kórsetýge jergilikti bıýdjetten 2,6 mlrd teńge bólinse, «Keń dala» jáne «Keń dala – 2» nesıeleý baǵdarlamalary boıynsha 12,9 mlrd. teńge bólindi, - dedi J.Halıýllın.

Basqarma basshysynyń aıtýynsha, oblysta sýbsıdııalaý baǵdarlamalary boıynsha sharýalar aldynda bereshekter joq. 2025 jyldyń sońynda «kútý paraǵyna» túsken ótinimder boıynsha bıyl tolyqtaı tólem jasaldy.

Kúni búginge deıin bıylǵa ósimdik sharýashylyǵyna qaralǵan qarajattar esebinen agroqurylymdarǵa 249 mln teńge sýbsıdııa tólense, «Keń dala» jáne «Keń dala – 2» nesıe baǵdarlamalary arqyly 4 mlrd teńgege jýyq nesıe berildi. «Keń dala» jáne «Keń dala – 2» nesıeleý baǵdarlamalary boıynsha qarjylandyrý «Agrarlyq nesıe korporatsııasy» AQ men olardyń aýdandardaǵy nesıe seriktestikteri, ekinshi deńgeıli bankter arqyly júrgiziledi.

Aýdandyq aýyl sharýashylyǵy bólimderiniń aýyl sharýashylyǵy qurylymdarynan jınaqtap usynǵan málimetterine sáıkes jazdyq egiske qajet 30 myń tonna tuqym tolyq daıyndaldy.

Qazirgi ýaqytta tuqym satýshylarmen jasalǵan kelisimsharttar negizinde keıbir dıqandarǵa tuqymdar áli de ákelinip jatyr.

Kóktemgi dala jumystaryna qatysatyn barlyq tehnıkalar jóndelip, daıyndalýda. Búginde qolda bar tehnıkalardyń ázirligi – 83 paıyz. Bul jumys naýqanǵa deıin tolyqtaı aıaqtalmaq.

Maýsymdyq dala jumystaryn sapaly ári ýaqytyly atqarý úshin dıqandardy arzandatylǵan dızel otynymen qamtamasyz etý asa mańyzdy. Bul shyǵyndy azaıtyp, egis naýqanyn kedergisiz ótkizýge múmkindik beredi.

- Egiske qajet dızel otynynyń kólemi ótken jyldyń jeltoqsan aıynda sharýalarmen usynylǵan ótinimder negizinde elektrondy túrde qalyptastyryldy. Osy ótinimderge sáıkes Batys Qazaqstan oblysyna Atyraý munaı óńdeý zaýytynan 10,5 myń tonna arzandatylǵan dızel otyny bólindi. Qazirgi ýaqytta Energetıka mınıstrligi dızel otynyna bekitilgen baǵa boıynsha naqty aqparat usynǵan joq. Osyǵan baılanysty jergilikti jerde dızel otynyn jetkizýshi operatordy anyqtaý máselesi ýaqytsha kesheýildep tur. Degenmen bul máseleniń jaýaby jaqyn kúnderi belgili bolyp, operatordy anyqtaý boıynsha tıisti sharalar qabyldanady, - dep qosty J.Halıýllın.

Eske sala keteıik, budan buryn Batys Qazaqstanda sharýalar jem-shópten taryqpaýy úshin ne istelýi kerektigi týraly jazǵan edik.