Batys Qazaqstanda balalar saýyqtyrý lagerleri sanıtarlyq tekserýden ótkizilip jatyr
ORAL. KAZINFORM – Batys Qazaqstan oblysynda balalar saýyqtyrý lagerleri sanıtarlyq tekserýden ótkizilip jatyr.
BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngte málim etkenindeı, osy ýaqytqa deıin nysannyń normatıvtik-quqyqtyq aktilerge sáıkestigi týraly sanıtarlyq-epıdemıologııalyq qorytyndy alý úshin 12 ótinish kelip túsip, soǵan sáıkes tıisti jumystar atqarylýda.
Atap aıtqanda, Bókeı ordasy aýdanynyń «Araı», Báıterektiń «Dostyq», Terektiniń «Baldáýren», «Jasulan», «Aq shaǵala», Syrymnyń «Dostyq», Jańaqalanyń «Kúnshýaq», Qaratóbeniń «Jasyl jelken», Bórliniń «Jas týrıster stantsııasy», sondaı-aq Oral qalasynyń «Atameken», «Daryn», «Samal» balalar saýyqtyrý uıymdarynan ótinishter qabyldandy.
«Qazirgi kezde atalǵan lagerlerdiń sanıtarlyq talaptarǵa sáıkestigine tekseris júrgizilýde. Oǵan qosa aǵymdaǵy jóndeý jumystary jalǵasýda. Munyń syrtynda buǵan deıin Shyńǵyrlaý aýdanynda «Araı» jáne Tasqalada «Shuǵyla» balalar saýyqtyrý uıymyna sanıtarlyq-epıdemıologııalyq qorytyndy berildi», - dedi Nurlybek Ermekuly.
Onyń aıtýynsha, balalardyń jazǵy demalysy men saýyqtyrý isin sapaly uıymdastyrý men olardyń qaýipsizdigin qamtamasyz etý asa mańyzdy.
Bıyl oblystyq bilim basqarmasynyń málimetine sáıkes 1-10 synyp aralyǵyndaǵy 7 217 balany jazǵy saýyqtyrý is-sharalarymen qamtý josparlanýda. Jaz mezgilinde qala syrtyndaǵy 17 saýyqtyrý ortalyǵy, mektepter janynda 595-ke jýyq kúndizgi lager (munyń 268-i – tamaqtandyrý uıymdastyrylyp, balalar uıyqtaıtyn oryndar, qalǵan 327-si - tamaqtandyrýsyz) jumys istemekshi.
«QR Densaýlyq saqtaý mınıstri mindetin atqarýshynyń «Halyqtyń sanıtarlyq-epıdemıologııalyq salaýattylyǵy salasyndaǵy memlekettik qyzmetterdi kórsetýdiń keıbir máseleleri týraly» 2020 jylǵy 30 jeltoqsandaǵy № 336 buıryǵyna sáıkes lagerlerde sanıtarlyq-epıdemıologııalyq qorytyndy alý úshin zerthanalyq-aspaptyq ólsheýler júrgizilip, hattamalar jasalady. Balalar kelgenge deıin barlyq saýyqtyrý ortalyqtary sanıtarlyq normalarǵa tolyq saı bolýy tıis. Sonymen qatar lagerler jumys istegen kezde sanıtarııalyq-epıdemıologııalyq baqylaý departamenti oblystyq bilim basqarmasymen birlese otyryp, nysandarǵa komıssııalyq monıtorıng júrgizetin bolady. Monıtorıng barysynda jiti ishek ınfektsııalary men tamaqtan ýlanýdyń aldyn alý maqsatynda balalardyń tamaqtaný jaıyna, olardyń medıtsınalyq kabınettermen, qyzmetkerlermen qamtamasyz etilýine, as blogynda taǵam ónimderin saqtaý sharttaryna jáne basqa sanıtarlyq talaptardyń oryndalýyna basa nazar aýdarylady», dedi N.Mustaev.
