Batys Qazaqstanda azamattardy qabyldaý ortalyqtary ashyldy
Memleket basshysynyń óńirlerde azamattardy qabyldaý ortalyqtaryn keńeıtý boıynsha tapsyrmasyn oryndaý maqsatynda oblys jáne Oral qalasy, Bórli aýdany ákimi apparatynyń janynda azamattardy qabyldaý ortalyqtary ashyldy, dep habarlaıdy Kazinform.
BQO ákimdiginiń baspasóz qyzmetinen málim etkenindeı, Oraldaǵy ortalyqtyń ashylý rásimine oblys ákimi Narıman Tóreǵalıev qatysty.
«Biz Memleket basshysynyń «Halyq únine qulaq asatyn memleket» tujyrymdamasyn iske asyrý baǵytynda jumys júrgizip jatyrmyz. Memlekettik organdardyń ashyqtyǵyn kórsetetin quraldyń biri azamattardy jeke qabyldaý bolyp tabylady. Byltyrǵy jyly oblystyń jergilikti atqarýshy organdarynyń ókilderi 7 746 azamatty jeke qabyldady. Osyndaı ortalyqtar azamattardyń ózekti máselelerin der kezinde quzyrly organdar ókilderiniń basshylarymen birlese sheshýge yqpalyn tıgizedi», dedi Narıman Tóreǵalıuly.
Atalǵan ortalyqta oblys ákimi aldyn ala jazylǵan 10 turǵyndy qabyldady. Olardyń basym bóligi áleýmettik máselelerin aıtty. Óńir basshysy tıisti sala basshylaryna azamattardyń máselelerin sheshý boıynsha tapsyrma berdi.
«Turǵyndardy tolǵandyratyn máselelerin anyqtaý jáne olardy sheshý maqsatymen qurylǵan azamattardy qabyldaý ortalyǵynda oblystyq basqarmalardyń quzyreti sheńberinde keńester berilip, oblys ákimimen, orynbasarlarymen, barlyq oblystyq basqarma basshylary men orynbasarlarymen jáne aýmaqtyq departament basshylarymen biryńǵaı kestege sáıkes aldyn ala jazý arqyly jeke qabyldaýlar júrgiziletin bolady. Endigi kezekte ortalyqta oblystyq basqarmalar, Oral qalasy ákimdigi jáne «Azamattarǵa arnalǵan úkimet» memlekettik korporatsııasy BQO fılıalynyń qyzmetkerleri jumys jasaıdy», dep habarlady BQO ákimdiginiń baspasóz qyzmeti.
