Batys Qazaqstanda aýlanǵan kıik sany 85 myńǵa jýyqtady

ORAL. KAZINFORM — Batys Qazaqstan oblysynda kıikti aýlaý jumystary jalǵasyp jatyr. 

BQO orman sharýashylyǵy jáne janýarlar dúnıesi aýmaqtyq ınspektsııasynyń basshysy Nurlan Rahymjanovtyń málim etkenindeı, kúni búginge deıin oblys boıynsha 85 myńǵa jýyq kıik aýlanǵan.

Onyń sózine qaraǵanda, sonyń ishinde 35,5 myńy atylyp alynsa, 49,5 myńy koral arqyly ustalǵan.

— Qazirgi ýaqytta oblys aýdandarynda 14 brıgada óz jumystaryn atqarýda. Sonyń ishinde 8-i atý, qalǵan altaýy koral ádisin qoldanýda. Qaýlyǵa sáıkes jumystar 30 qarashada aıaqtalady, — dedi Nurlan Rahymjanov.

Inspektsııa basshysynyń aıtýynsha, «Kýbleı» JShS-da konservi jasaý úshin kıik eti jınaqtalyp jatyr. Basqa kásiporyndar kıik etin oblystan tysqary jerlerge ótkizip jatyr.

Batys Qazaqstan oblysynda kıik eti jumystar atqarylyp jatqan aýdandarda, sondaı-aq Báıterek aýdany Baıqonys aýylynda, Oralǵa qarasty Krýgloozernyı kentinde, oblys ortalyǵynda depo bazarynda satylyp jatyr.

Óńirde bıylǵy kóktemde 2,3 mln kıik sanaqqa ilikken bolatyn.

Eske sala keteıik, budan buryn Batys Qazaqstanda konservilengen kıik eti satylymǵa shyǵatynyn jazǵan edik.