Batys Qazaqstanda aýyrǵan usaq mal shyǵynǵa ushyrady
ORAL. KAZINFORM — Batys Qazaqstan oblysy Jánibek aýdany Qamysty aýylynda qoı men qozylardyń aýyryp jatqany jóninde beınejazba tarady.
BQO veterınarııa basqarmasynyń baspasóz qyzmetinen málim etkenindeı, 3 aqpan kúni Qamysty aýyldyq okrýgindegi veterınarııalyq pýnktke A. Esqalıevtiń sharýa qojalyǵynan qańtar aıynda 1 qoı, 1 qozy, aqpanda 2 qozy ólgendigi jóninde habarlama túsken.
Sol kúni veterınar mamandarmen barlyq qoı men qozylarǵa veterınarlyq preparat egilgen.
11 aqpan kúni vetpýnkt meńgerýshisi aýdandyq veterınarııalyq stantsııaǵa Qamysty aýyly turǵynyna tıesili usaq maldarynyń aýrýy jáne ólimi tirkelgendigin habarlaǵan.
12 aqpanda osy jaǵdaıdy anyqtaý maqsatynda Jánibek aýdandyq aýmaqtyq veterınarııalyq ınspektsııasynyń basshysy men aýdandyq veterınarııalyq stantsııa dırektory sharýashylyqqa bardy. Sharýashylyqta barlyǵy 69 qoı, 20 qozy bar ekendigi anyqtaldy. 11 qoıda (murynnan bólindi aǵý, kózdiń jasaýraýy) aýrý belgileri baıqalyp, olar bólek qoraǵa oqshaýlandy.
— Qozylardyń arasynan bireýi ólgen, 5 basynda uqsas klınıkalyq belgiler tirkelip otyr. Barlyq aýrý belgisi bar qozy men qoıǵa qajetti emdik sharalar jasalyp, antıbıotıktik em júrgizildi. Jalpy shyǵyn — 5 bas. Mal birneshe kún buryn ólgendikten, patologııalyq materıal alý múmkindigi bolmady. Mal ıesine qozylardyń jataǵyn ýaqytyly tazalap, aýystyrý, aýrý maldy oqshaýlaý jáne veterınarııalyq-sanıtarııalyq talaptardy qatań saqtaý jóninde túsindirý jumystary júrgizildi. Qazirgi tańda atalǵan jaǵdaı veterınar mamandardyń jiti baqylaýynda, — dep habarlady vedomstvodan.
Jánibek aýdany ákimdigi dıagnozdy naqtylaý jáne epızootııalyq jaǵdaıǵa keshendi tekserý júrgizilip jatqanyn jetkizdi.
— Tekserý qorytyndysy boıynsha qoldanystaǵy zańnama aıasynda tıisti sheshimder qabyldanady. Laboratorııalyq zertteýlerdiń nátıjeleri men odan ári qabyldanatyn sharalar týraly qosymsha aqparat barlyq tekserý jumystary aıaqtalǵannan keıin usynylady, — delingen resmı málimette.
Eske sala keteıik, budan buryn Batys Qazaqstanda jylqylardyń ashtan ólip jatqany ras pa, sony jazǵan edik.