Batys Qazaqstanda aýyl janynda azap pen ashtyqtan qyrylǵan adamdar jerlengen
ORAL. KAZINFORM – Batys Qazaqstan oblysynda azap pen ashtyqtan jappaı qyrylǵan adamdar Terekti aýdany Prıdorojnyı aýyly mańynda jerlengen.
Ólketanýshy, «DANA» ortalyǵynyń basshysy Jantas Safýllınniń málim etkenindeı, Prıdorojnyı aýylynda keńes dáýiri kezinde №12 eńbekpen túzetý lageri bolǵan.
Osy aýyldyń baıyrǵy turǵyny Shapaǵat Myrzahmetulynyń aıtýynsha, azap pen ashtyqtan qysta da, jazda da ólgen adamdar 2 gektardaı jerge jerlengen.
«Bulardyń bári aq tómpeshik bolyp kórinip jatyr. Óıtkeni osy jerdi qazǵanda, aq balshyq shyqqan», - deıdi qarııa.
Qazirgi kezde Oral qalasynda turatyn zeınetker Kenjebaı Rahımov ákesi Jumanyń 1950 jyly sottalyp, osy Prıdorojnyı aýylyndaǵy eńbekpen túzeý lagerinde jazasyn ótegenin jetkizdi. Jazasyn óteýshilerdiń barlyǵy baraktarda turǵan.
BQO-daǵy saıası qýǵyn-súrgin qurbandaryn tolyq aqtaý jónindegi óńirlik komıssııanyń jumys tobyna jetekshilik etken J.Safýllınniń sózine qaraǵanda, arhıv derekteri boıynsha 1949 jyly atalmysh lagerde 1130 adam jazasyn ótegen. Osyndaǵy kartser men burynǵy kókónis qoımasy qazirge deıin saqtalǵan. Sonymen qatar osy mańdaǵy Kóbensaı aýylyndaǵy lagerden áıelderdi tańerteń aıdap ákelip, kókónis ósirilgen plantatsııada jumys istetip, keshkisin keri áketip otyrǵan.
«Bul lagerde saıası qýǵyn-súrgin qurbandary da jazasyn ótegen. 1949 jyly Qylmystyq kodekstiń 58-10-babyna sáıkes sottalǵan 55 adam bolǵan. Oǵan qosa ashtyqtan ólmes úshin bir ýys bıdaı urlap, isti bolǵandar, jazyqsyz jalanyń qurbanyna aınalǵandar qanshama. Prıdorojnyı aýylynda adamdar jerlengen degen jerdiń aýqymy úlken. Sondyqtan bolashaqta qazba jumystaryn júrgizip, jerlengen adamdardyń aty-jónin barynsha anyqtaý, oryndy áli de zerttep, naqtylaý úshin jumystaný kerek. Jappaı jerlengen jer bolsa, mindetti túrde arnaıy belgi qoıylyp, qorshaý kerek», - dedi Kazinform tilshisine Jantas Safýllın.
Eske sala keteıik, budan buryn tarıhshynyń Batys Qazaqstanda saıası tutqyndar qamalǵan birneshe lager bolǵany týraly aıtqanyn jazǵan edik.
