Batys Qazaqstanda aýyl turǵyny jaraly aqqýdy daladan taýyp aldy
ORAL. KAZINFORM – Batys Qazaqstan oblysy Qaratóbe aýdany Aqqozy aýyldyq okrýgi Qorjyn aýylynyń turǵyny jaraly aqqýdy qorada ustap otyr.
Atalmysh aýyl turǵyny, zeınetker Serikqalı Nuradılovtiń málim etkenindeı, kórshisi Nurlybaı Quspanov mototsıklmen qoı baǵyp júrip, 29 naýryz kúni aýyldan úsh shaqyrymdaı jerden jaraly aqqýdy taýyp alǵan.
- Sodan keıin «Júre almaı tur, túlki, qarsaq jep kete me dep qorqyp turmyn», dep maǵan habarlasty. Kólikpen baryp, úıge alyp keldim. Qazir qorada tur, jem-sýyn berdim. Sýyn ishken sııaqty. Aýdandyq veterınarlyq stantsııaǵa habar berdim. Erteń mamandardy kútip, sosyn Jaqsybaı ózeniniń qamysy, qoǵasy qalyń jerine jibermek oıym bar, - dedi S.Nuradılov.
Osy máselege oraı Kazinform tilshisi oblystyq ekologııalyq-bıologııalyq ortalyq dırektory Gúljaına Nuralıevaǵa habarlasqan edi.
Mamannyń sózine qaraǵanda, ortalyqta aqqýlar turatyn oryn tar. Ol jerde solaı jaralanǵan aqqýlar tur. Syrttan kelgen aqqýdy syıystyrmaı talaıdy.
- Aqqýǵa bıdaı, arpa, suly, úgitilgen sábiz, oramjapyraq qabyǵyn, asqabaq berýge bolady, kók shóp jeıdi. As úıden qalǵan qaldyq tamaqty bermeıdi. Beınetaspadan kórinip turǵandaı, tumsyǵynan jaralanǵan, ushyp kele jatyp, qalyp qoıǵan bolýy kerek. Maman qarasa, ishine zaqym kelmese, qorqynyshty emes. Qazir kún jyly, ondaı qustardy emdep, tabıǵatqa jiberý kerek, - dedi G.Nuralıeva.
Eske sala keteıik, budan buryn 2024 jylǵy tasqyn kezinde Oralda zoobaqtaǵy janýarlar men qustar qaýipsiz jerge kóshirilgenin jazǵan edik.
Sondaı-aq Oralda muz ústinde júrgen aqqý beınetaspaǵa túsip qaldy.
