Batys Qazaqstanda aýyl turǵyndary qarǵa kómilgen qoılardy qutqardy
ORAL. KAZINFORM — Batys Qazaqstan oblysynda boran kezinde qoılardyń qarǵa kómilip qalǵany jóninde beınejazba tarady.
Beınejazbada adamdardyń maldy qardan arshyp alyp jatqany kórinedi. Kaztalov aýdany ákimdiginen alynǵan málimetke qaraǵanda, oqıǵa 14 jeltoqsan kúni Birik aýyldyq okrýgine qarasty Ájibaı aýylynan 28 shaqyrym qashyqtyqta ornalasqan Jumyr qystaǵynda boldy.
— Boran saldarynan qansha maldyń shyǵynǵa ushyraǵany belgisiz. Qazirgi kezde olardyń naqty sany anyqtalyp jatyr. Mal «Qadyrbolat» sharýa qojalyǵyna (basshysy Qýanysh Muqashev) tıesili, — dep habarlady Kaztalov aýdany ákimdiginen.
Turǵyndardyń sózine qaraǵanda, óńirde basqa da aýdandarda borannan keıin tórt túlik mal túgendelip jatyr.
Eske sala keteıik, budan buryn BQO-da boranda joǵalyp ketken úsh adamnyń denesi tabylǵanyn jazǵan edik.
Sondaı-aq BQO-da taǵy bir er adamnyń denesi tabyldy.
