Batys Qazaqstanda aýyl kósheleriniń sýǵa tolǵany ras pa
ORAL. KAZINFORM — Batys Qazaqstan oblysy Aqjaıyq aýdany Jaıyq aýylynda qos kósheniń sýǵa tolyp turǵany jóninde áleýmettik jelide beınejazba jarııalandy.
Osyǵan oraı Kazinform tilshisi Aqjaıyq aýdany ákimdigine habarlasyp, naqty jaǵdaıdy bilgen edi.
Aýdan ákimdiginen túsken málimetke qaraǵanda, Chapaev aýyldyq okrýgine qarasty Jaıyq aýylyndaǵy Jaqsyǵulov jáne Qazaqstan kóshelerine qar sýy jınalǵany týraly jarııalanym Instagram áleýmettik jelisine 27 naýryzda salynǵan.
Ákimdiktiń naqtylaýynsha, beınetaspa shamamen 17 naýryzda túsirilgen. Sol kúni «JaıyqTehServıs» MKK tehnıkasymen sý burý joldaryn tazalaý jumystary júrgizilgen.
Turǵyn úılerdiń sýǵa ketý derekteri tirkelgen joq. Sondaı-aq aýyl turǵyndary 15-20 kún boıy úılerinen shyǵa almady degen derek shyndyqqa sáıkes kelmeıdi. Aýdan ortalyǵy Chapaev aýylymen qarym-qatynas uıymdastyrylyp, balalar mektepke ýaqytyly bardy.
— Budan bólek, 2024 jyly Jaıyq eldi mekeniniń aýylishilik joldaryn kúrdeli jóndeýge jobalyq-smetalyq qujattama jasaldy. Joldyń jalpy uzyndyǵy — 2,6 km, joba quny — 260,3 mln teńge. Alaıda qarjylandyrýdyń joqtyǵyna baılanysty atalǵan JSQ memlekettik saraptamaǵa jiberilgen joq, — delingen resmı jaýapta.
Sonymen qatar Terekti aýdany Taqsaı (Donetsk) aýylynyń turǵyndary áleýmettik jeli arqyly aýdan ortalyǵymen baılanystyratyn joldyń joqtyǵyn aıtyp shaǵymdandy.
— Taqsaı aýdan ortalyǵy Terekti aýylynan 5 shaqyrymdaı qashyqtyqta ornalasqan. Áıtse de jóni túzý jol joq. Joldyń joqtyǵy aýyl turǵyndary, avtobýs qatynasy, basqa da qyzmetter úshin úlken qıyndyq týǵyzyp otyr. Mektepke, aýrýhanaǵa jetý muńǵa aınaldy. Birneshe ret júgingenimizge qaramastan, osy kezge deıin ákimdik tarapynan esh shara alynǵan joq, — deıdi turǵyndar.
Bul máselege baılanysty Terekti aýdany ákimdiginen málim etkenindeı, aýdandyq mańyzy bar atalǵan jol 2026-2030 jyldarǵa arnalǵan oblystyq damý baǵdarlamasyna engizilgen. Qum-qıyrshyqtas tóseý jumystaryn júrgizý úshin jobany jasaý 2027 jylǵa josparlanǵan. Aýa raıy jaqsaryp, jer kepkennen keıin Taqsaı aýylyna kireberis joldy merdiger uıym «ASFA» JShS tegisteıtin bolady.
Terekti aýyldyq okrýgine qarasty Taqsaı eldi mekeninde 45 otbasy turady. Turǵyndar sany — 108.
Eske sala keteıik, budan buryn Batys Qazaqstanda erigen qar sýy joldyń ústine shyǵyp ketkenin jazǵan edik.
Sondaı-aq Batys Qazaqstanda qar kúrt erip, joldy buzyp ketti.
Batys Qazaqstanda qar sýy aýylǵa kireberis joldy shaıyp ketti.