Batys Qazaqstanda arnaıy olımpıadalyq klýb ashylmaq

ORAL. KAZINFORM — Batys Qazaqstan oblysynda Parıj Olımpıadasynan keıin olımpıadalyq sport túrlerin damytý baǵytynda is-sharalar júzege asyrylmaq. 

BQO dene shynyqtyrý jáne sport basqarmasynyń basshysy Jeńis Nyǵmetýllınniń Kazinform tilshisine málim etkenindeı, olımpıada oıyndaryna sapaly daıyndyq júrgizý, sonyń ishinde joǵary nátıje kórsetip júrgen sportshylardy ustaýǵa basa nazar aýdarylady.

Jeńis Mahambetulynyń sózine qaraǵanda, álemdik deńgeıge jetkizý úshin sportshyny turaqty túrde jalaqymen, qural-jabdyqtarmen, issapar qarajattarymen únemi qamtamasyz etý qajet. Biliktiligi joǵary bapkerlerdiń kerektigi de aıdaı anyq.

«Osyǵan oraı arnaıy olımpıadalyq klýb ashýdy kózdep otyrmyz. Bul jobanyń quny – 200 mln teńge. Tıisti bıýdjettik ótinim ázirlendi», - deıdi J.Nyǵmetýllın.

Oǵan qosa sporttyq uıymdarda olımpıadalyq emes sport túrleriniń sany qysqartylady. Onyń ornyna olımpıadalyq kórkem gımnastıka men bıatlon sııaqty sport túrlerinen jańadan bólimsheler ashý oılastyrylady. Sol sekildi medal kóp beretin olımpıadalyq sport túrlerin damytýǵa den qoıylady.

«Memleket basshysy Qasym-Jomart Toqaev óz tapsyrmasynda elimizde sportshylardy kásibı medıtsınalyq jáne qalpyna keltirý qyzmetimen qamtamasyz etýge erekshe kóńil aýdarýdy usyndy. Osyǵan oraı ár óńirde dárigerlik-dene shynyqtyrý dıspanserin ashý josparlandy. Bul baǵytta da 450 mln teńgege tıisti bıýdjettik ótinim daıyndaldy», - deıdi basqarma basshysy.

Onyń aıtýynsha, Prezıdenttiń sporttyq ınfraqurylymdy nyǵaıtý jónindegi tapsyrmalaryn oryndaý maqsatynda aldaǵy qyrkúıek aıynda Kaztalov jáne Tasqala aýdandarynda 2 dene shynyqtyrý-saýyqtyrý kesheni qoldanysqa beriledi. Osylaısha, barlyq aýdan atalmysh keshendermen tolyq qamtylady.

Prezıdent tapsyrmasyna sáıkes Oral qalasyndaǵy 10-shaǵynaýdanda «QazMunaıGaz» UK» AQ qarajaty esebinen salynyp jatqan kópatqarymdy sport keshenin bıylǵy jyl sońynda paıdalanýǵa berý josparlanýda. Kúni búgin qurylys jumysy 43 paıyzǵa oryndaldy.

Sol sekildi múmkindigi shekteýli adamdardyń sportpen shuǵyldanýyna jaǵdaı jasaý maqsatynda «Jastar» stadıonynyń janynan dene shynyqtyrý-saýyqtyrý kesheni turǵyzylýda.

«Sondaı-aq aýyldarda sport keshenderiniń qurylysy jalǵasady. Mysaly, jergilikti bıýdjet esebinen Jańaqala aýdanynyń Jańaqazan, «QPO b.v.» kompanııasynyń qarjysyna Báıterektiń Darııan, Terektiniń Aqjaıyq, «Samruk-Kazýna Trust» qoldaýymen Terektiniń Jańaómir aýylynda jańa ǵımarattar boı kótermek. Oral qalasynda P.Atoıan atyndaǵy stadıondy qaıta jańartý úshin jobalyq-smetalyq qujattama jasalyp, memlekettik saraptamaǵa berildi. Jergilikti bıýdjet esebinen qalalyq mádenıet jáne demalys saıabaǵyndaǵy esý bazasyn qaıta qurý jumystaryn júrgizý kózdelýde. Parıj Olımpıadasyna qatysqan eskekshi Marııa Brovkovanyń osy ortalyqta tárbıelengeni belgili. «Aqjaıyq» shaǵynaýdanynda ústel tennısi ortalyǵyn salý úshin 2 gektar jer belgilendi. Munyń bári sportshylardyń sheberligin ushtap, jetistigin molaıtýmen qatar turǵyndardyń dene shynyqtyrýmen aınalysýyna barynsha jaǵdaı jasaý maqsatynda qolǵa alynýda», - dep túıindedi sózin J.Nyǵmetýllın.

Eske sala keteıik, budan buryn Marııa Brovkovanyń Olımpıadada el úmitin aqtaýǵa kúsh salatynyn jazǵan bolatynbyz.