Batys Qazaqstanda AITV ınfektsııasyn juqtyrǵandar sany 60-tan asty

ORAL. KAZINFORM – Batys Qazaqstan oblysynda bıylǵy 10 aıda 61 adamnyń AITV (VICh) ınfektsııasyn juqtyrǵany anyqtaldy. 

BQO AITV ınfektsııasynyń aldyn alý ortalyǵynyń dırektory Aqtilek Ómirbaevtyń óńirlik kommýnıkatsııalar qyzmeti alańynda ótken brıfıngte málim etkenindeı, bul ótken jylǵydan 8 derekke kóp.

Aqtilek Armandaulynyń sózine qaraǵanda, bul eń aldymen anyqtaý sharalarynyń kúsheıýine baılanysty bolyp otyr. Dertke shaldyqqandardyń 42-si Oral qalasy, sondaı-aq altaýy Bórli aýdany, tórteýi Terektiniń úlesine tıedi. Báıterek pen Aqjaıyqta – eki-ekiden, Tasqala, Jańaqala, Kaztalov jáne Shyńǵyrlaý aýdanynda bir-bir adamnan tabylǵan. Sonymen qatar bireýiniń basqa oblystan kelgeni anyqtaldy.

– Juqpaly syrqat balalar men jasóspirimderdiń arasynda tirkelgen joq. Syrqattanýshylardyń eń kóbi (26) – 30-39 jas aralyǵynda. Al 20-29 jastaǵylardan – 7, 40-49-dan – 16, 50-59-dan 9, alpystan asqandardan 3 adamnyń keseldi juqtyrǵany belgili boldy. Bulardyń ishinde 41-i nemese 67,2 paıyzy – er, 20-sy (32,8 paıyzy) – áıel adamdar, - deıdi A.Ómirbaev.

Onyń aıtýynsha, 27-si eńbek etýshiler qatarynan bolsa, 26-sy – jumyssyzdar. Oǵan qosa 2 zeınetker, 2 jazasyn óteýshi, 2 tergeýde jatqan, 1 áskerı qyzmetshi, áleýmettik mártebesi anyqtalmaǵan 1 adam esepke ilikken.

– Juqpaly derttiń 88,6 paıyzyna deıini jynystyq jolmen taralǵan. Sonymen qatar 9,8 paıyzy parenteraldyq jolmen juqqan, bul eń aldymen ınektsııalyq esirtki qoldanýmen baılanysty. Bul úles aldyńǵy jyldarmen salystyrǵanda, tómendegenimen, áli de ózekti bolyp otyr. 1996 jyldan beri óńirde AITV ınfektsııasynyń 1 192 deregi tirkelgen, - dedi ortalyq basshysy.

Eske sala keteıik, budan buryn Batys Qazaqstanda 50-den astam adamnyń AITV ınfektsııasyn juqtyrǵanyn jazǵan edik.