Batys Qazaqstanda 800-den astam iri qara brýtsellez aýrýyna shaldyqqan
ORAL. KAZINFORM — Batys Qazaqstan oblysynda veterınarııalyq is-sharalar josparyna sáıkes bıyl 1 mln 005,697 myń bas iri qara, 1 mln 370,299 myń qoı-eshki, 838 túıe, 214 shoshqany brýtsellezge tekserý kózdelgen.
BQO veterınarııa basqarmasynan málim etkenindeı, veterınarııalyq-sanıtarııalyq qaǵıdalar talaptaryna saı jasy 12 aıdan asqan barlyq iri qara, qoı-eshki maldary brýtsellezge jylyna eki ret (kóktemde jáne kúzde), túıeler – jylyna bir ret, jylqy men shoshqalar aýrýǵa kúdiktený bolǵan kezde zertteledi.
Bıylǵy úsh aıda oblys boıynsha zerttelgen 155 278 bas iri qaranyń 827-sinen brýtsellez anyqtalǵan, zaqymdaný kórsetkishi – 0,5 paıyz. Bulardyń 763-i sıyr, 64-i buqa ekendigi belgili boldy. Sondaı-aq 301-i sharýa qojalyqtaryna, 526 basy jeke turǵyndarǵa tıesili.
Basqarma málimetine qaraǵanda, sonyń ishinde, Aqjaıyq aýdany boıynsha birinshi toqsanda 33 985 iri qaranyń 177-si brýtsellezge shaldyqqan bolyp shyqty. Munyń 58-i - jeke turǵyndar, 119-y -sharýa qojalyqtarynyń maly.
Veterınarııalyq-sanıtarııalyq qaǵıdalarǵa sáıkes mal ıeleri memlekettik veterınarııalyq-sanıtarııalyq ınspektorynyń nusqamasy negizinde 15 kúntizbelik kúnnen aspaıtyn merzim ishinde aýrý janýarlardy sanıtarııalyq soıýdy júzege asyratyn óndiris nysandaryna (et kombınaty, soıý pýnkti) tapsyrýy tıis.
- Brýtsellez tabylǵan iri qara men shoshqanyń, túıeniń, jylqynyń ushasy men aǵzalarynda patologııalyq ózgerister bolmaǵan kezde et 12 saǵat muzdatqyshta turǵannan keıin shekteýsiz paıdalanýǵa bolady. Aýrý qoı men eshkini sanıtarııalyq soıýdan alynǵan et pisirilgen shujyqtarǵa nemese konservilerge qaıta óńdeledi, - dep naqtylady veterınarııa basqarmasy.
Eske sala keteıik, budan buryn Batys Qazaqstanda kıikterdiń malǵa aýrý taratyp jatqany ras pa, sony jazǵan bolatynbyz.
