Batys Qazaqstanda 75 myńnan astam oqýshy qashyqtan bilim alyp jatyr
ORAL. KAZINFORM — Batys Qazaqstan oblysynda tótenshe jaǵdaıǵa baılanysty 15 sáýirden bastap Jaıyq ózeniniń jaǵalaýynda ornalasqan Aqjaıyq, Báıterek, Bórli, Terekti aýdandary jáne Oral qalasynyń mektepteri men kásiptik-tehnıkalyq jáne qosymsha bilim berý uıymdarynda shákirtter qashyqtan oqyp jatyr.
BQO bilim basqarmasynyń basshysy Aıgúl Myńbaevanyń óńirlik kommýnıkatsııalar qyzmeti alańynda ótken brıfıngte málim etkenindeı, qashyqtyqtan oqý onlineMektep.org, BilimAll.kz, Daryn.online platformalar arqyly uıymdastyrylýda, platformanyń mobıldi nusqalary da jumys jasaıdy.
Aıgúl Ádilgereıqyzynyń sózine qaraǵanda, atalǵan aýdandar men Oral qalasynda 130 mektep bar bolsa, kúni búgin sonyń 103-inde 75 591 oqýshy qashyqtan bilim alýda. Al Aqjaıyq aýdanynyń Jaıyq jaǵalaýynda ornalasqan 33 mektebi jergilikti jaǵdaıǵa baılanysty dástúrli túrde oqýda.
«Mektep dırektorlaryna pedagogıkalyq ujym men oqýshylar arasynda túsinik jumystaryn júrgizý, sý tasqyny kezinde qashyqtyqtan oqýǵa kóshý máselesin pedagogıkalyq keńeste talqylap, oqýshylardy qajetti kompıýterlik tehnıkamen qamtamasyz etý tapsyryldy. Bul másele bilim basqarmasynyń, aýdandyq jáne qalalyq bilim bólimderiniń baqylaýynda. Ata-analardan sý tasqyny kezinde balalardyń qaýipsizdigin qadaǵalap, baqylaýsyz qaldyrmaýǵa basa nazar aýdarýdy suraımyz. QR Oqý-aǵartý mınıstrliginiń 10 sáýirde ótken jınalysynyń hattamasyna sáıkes Atyraý jáne Aqtóbe oblystaryndaǵy mektepterde aǵymdyq baqylaý ótkizý toqtatyldy. Bizdiń oblys boıynsha aǵymdyq baqylaý ótkizý týraly sheshim jergilikti jaǵdaıǵa baılanysty qabyldanatyn bolady», - dedi A.Myńbaeva.
Basqarma basshysynyń aıtýynsha, bilim alýshylardyń bilim jetistikteri monıtorıngi bıylǵy sáýirge josparlanǵan bolatyn. Oblys boıynsha 87 mektep engizildi. Sý tasqyny jaǵdaıyna baılanysty 2 mektepte (Bórli aýdany Aqsaı qalasy №8 mektep, Terekti aýdany Podstepnyı №1 mektebi) ótkizilmeıtin boldy. Qalǵan 85 mektepte ótkizý merzimi mamyr aıyna aýystyryldy.
1 sáýirden bastap 31 tamyzǵa deıin bilim berý uıymdaryna birinshi synypqa qabyldaý júrgizilýde, 2024-2025 oqý jylyna aldyn ala derekter boıynsha 1 synypqa 12 483 oqýshy qabyldanbaqshy. Kúni búginge deıin 2 177 ótinish tústi, bul – boljamdy sannyń 17,4 paıyzy. Ótinishter www.egov.kz «elektrondyq úkimet» veb-portaly jáne bilim berý uıymdary arqyly qabyldanady.
«Búgingi tańda 16 792 stýdent oqıtyn 36 tehnıkalyq jáne kásiptik bilim berý uıymynyń Oral qalasynda ornalasqan 22-sinde (13 792 stýdent) bilim alý qashyqtyqtan oqý formatyna aýystyryldy (college.snation.kz). Jataqhanalary bar 4 kolledjde evakýatsııalyq pýnktter ornalasty. Oblys boıynsha bilim nysandarynda 6 evakopýnkt jumys jasap tur (Qaratóbe – 1, Bórli – 1, Oral qalasy – 4). Eki joǵary oqý ornynda 3 evakopýnkt jasaqtaldy. Qajet bolǵan jaǵdaıda bilim nysandarynan 164 evakýatsııalyq pýnkt ashý múmkindigi bar, onyń ishinde 149-y mektepten, 15-i kolledjden. Oblysta 13 evakýatsııalyq pýnkt bolsa, onda 968 bala turyp jatyr», - dedi A.Myńbaeva.
Eske sala keteıik, budan buryn Oralda jaýyngerdiń jalǵyz ózi 30-ǵa jýyq adamdy tasqyn sýdan aman alyp shyqqanyn jazǵan bolatynbyz.
Sondaı-aq Oralda jeti balabaqsha ýaqytsha jabyldy.
Batys Qazaqstanda 2 300-ge jýyq adam evakýatsııalyq pýnktterde jatyr.
