Batys Qazaqstanda 75 adam gonkong tumaýyna shaldyqqan
ORAL. KAZINFORM — Batys Qazaqstan oblysynda 1 qazannan beri 75 adam gonkong tumaýymen (H3N2) aýyrsa, sonyń 55-i — balalar.
BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń málim etkenindeı, sonymen qatar 5 júkti áıel tumaý juqtyrǵan.
Onyń sózine qaraǵanda, tumaý tárizdes emes vırýstardan adenovırýs, rınovırýs, bokovırýs, rs-vırýs, pandemııalyq emes koronavırýs anyqtaldy.
— Óńirde 1 qazannan bastap 37 457 adamnyń jiti respıratorlyq vırýsty ınfektsııalar (JRVI) juqtyrǵany tirkeldi. Bul kórsetkish ótken jyldyń osy kezeńimen salystyrǵanda 8 paıyzǵa tómendedi. Aýyrǵandardyń 26 391-i 14 jasqa deıingi balalar. Sonyń ishinde 356-sy bir jasqa tolmaǵan. Sonymen qatar 58 ekiqabat áıel syrqattanǵan. Bul — júktiligine baılanysty esepte turǵandardyń 0,1 paıyzy, — dedi Nurlybek Mustaev.
Departament basshysynyń orynbasary JRVI-diń taralýyna jol bermeý úshin saqtyq sharalaryn umytpaý, aýyra qalǵan jaǵdaıda ózdiginen emdelmeı, dárigerge júginý kerektigin eske saldy.
Eske sala keteıik, budan buryn BQO-da 177 mektepte 440-tan astam oqýshynyń JRVI-men aýyrǵanyn jazǵan edik.
Sondaı-aq Batys Qazaqstanda 3 400-den astam adam jelsheshekpen aýyrǵan.