Batys Qazaqstanda 700-den astam saıajaı úılerin sý basty
ORAL. KAZINFORM - Jaıyq ózeninde sý deńgeıiniń kóterilip, qaýip tóndirýine baılanysty Oral qalasynda birneshe kúnnen beri saıajaı turǵyndary kóshirilip jatyr.
BQO TJ departamentiniń baspasóz qyzmetinen málim etkenindeı, ózen jaıylmalarynda ornalasqan 706 saıajaı úıin sý basty.
Ótken táýlikte oblystyq mańyzy bar 1 oblystyq joldan sý ótken. Sý shaıyp ketken 60 jol ýchaskesi baqylaýda. Oblys boıynsha burynǵysha 9 eldi meken qatynassyz qalyp otyr.
«Sý tasqyny bastalǵannan beri 12 970 adam evakýatsııalansa, sonyń 5 398-i — balalar, 19-y — múmkindigi shekteýli adamdar. Evakýatsııalyq pýnktterde ornalasqan 1 801 adamnyń 777-si — balalar. 4 886 bas mal qaýipsiz jerlerge aıdaldy. Óńirde 1 mln astam erigen qar sýy sorylyp, 254 120 qapshyq tóseldi. Qazirgi ýaqytta barlyq jumystarǵa 1 452 adam (128 tehnıka, 8 motopompa, 9 júzý quraly, 3 tikushaq) jumyldyryldy», dep habarlady vedomstvodan.
«Qazsýshar» RMK Batys Qazaqstan fılıalynyń málimeti boıynsha búgin saǵat 15.00-de Orynbor oblysyndaǵy Irıkla sý qoımasynan Jaıyq ózenine sekýndyna 993 tekshe metr sý jiberilýde. Jaıyqtyń Oral qalasy tusyndaǵy deńgeıi 722 santımetrge jetti.
Eske sala keteıik, budan buryn Oral qalasynda qum toltyrylǵan 125 myń qapshyq daıyndalǵanyn jazǵan bolatynbyz.
Sondaı-aq Batys Qazaqstanda mal ólekselerin joıý jumystary júrgizilip jatyr.
