Batys Qazaqstanda 70-ten astam kóppáterli turǵyn úı apatty dep tanylǵan
ORAL. KAZINFORM — Batys Qazaqstan oblysynda 2 533 kóppáterli turǵyn úı bolsa, sonyń 1 540-y nemese 60,8 paıyzy kúrdeli jóndeýdi qajet etedi.
BQO energetıka jáne turǵyn úı-kommýnaldyq sharýashylyq basqarmasy basshysynyń orynbasary Qanat Ómirálıevtiń málim etkenindeı, 671 úıdiń (26,4 paıyz) jaǵdaıy qanaǵattanarlyq bolsa, 73-i (2,9 paıyzy) apatty dep tanylǵan. 249 kóppáterli úı (9,9 paıyzy) eskirgen.
Qanat Amangeldiulynyń sózine qaraǵanda, zańnamaǵa sáıkes jergilikti atqarýshy organdarǵa jalǵyz baspanasy apatty dep tanylǵan azamattarǵa kommýnaldyq turǵyn úı qorynan turǵynjaı berý jáne ony bólý jónindegi quzyret berilgen.
- Qazirgi tańda oblys boıynsha turǵyn úıge muqtajdar esebinde 45 018 azamat tirkelse, sonyń 645-i – jalǵyz baspanasy apatty dep tanylǵandar. Osyndaı sanattaǵy azamattar úshin qala jáne aýdan ákimdikteri Oralda – 140, Qaratóbe aýdanynda – 1, Syrymda – 72, Tasqalada 26 páter satyp aldy. Osy turǵynjaılardy qoldanystaǵy zańnamaǵa sáıkes jalǵyz baspanasy apatty dep tanylǵan azamattar arasynda jyl sońyna deıin bólý josparlanýda, - dedi Q.Ómirálıev.
Onyń aıtýynsha, turǵyn úı-kommýnaldyq sharýashylyqty jańǵyrtýdyń memlekettik baǵdarlamasyn iske asyrý aıasynda oblys boıynsha 2011–2025 jyldar aralyǵynda barlyǵy 499 kóppáterli turǵyn úıge jóndeý jumystary júrgizildi. Sonyń ishinde 162 joba boıynsha lıftiler aýystyryldy.
Kúni búgin Oral qalasynda qaıtarymdy qarajat esebinen jalpy quny 125,2 mln teńge bolatyn lıftilerdi aýystyrý boıynsha 4, shatyrlardy jóndeýge qatysty 2 joba júzege asyrylýda.
- Turǵyndar tarapynan úıler men shatyrlarǵa kúrdeli jóndeý júrgizýge, sondaı-aq tozǵan lıftilerdi aýystyrýǵa qyzyǵýshylyqtyń artýyna baılanysty jobalar sany da ulǵaıýda. Osyǵan baılanysty bıyl QR Ónerkásip jáne qurylys mınıstrligine respýblıkalyq bıýdjetten qarajat bólý maqsatynda jalpy quny 1 210,3 mln teńge bolatyn 54 joba boıynsha bıýdjettik ótinim joldandy. Mınıstrlik tarapynan qoldaý kórsetilgen jaǵdaıda 2027 jyly lıftilerdi aýystyrý boıynsha 46 jáne shatyrlardy jóndeýge qatysty 8 joba iske asyrylatyn bolady, - dep qosty Q.Ómirálıev.
Eske sala keteıik, budan buryn Oralda barar jer, basar taýy joq turǵyndardyń apatty úıde turyp jatqanyn jazǵan edik.
