Batys Qazaqstanda 70-ten astam adamnyń týberkýlezge shaldyqqany tirkeldi
ORAL. KAZINFORM — Batys Qazaqstan oblysynda týberkýlezben aýyrǵandar sany kóbeıip ketip otyr.
BQO sanıtarııalyq-epıdemıologııalyq baqylaý departamentiniń baspasóz mamany Kenjegúl Muhıtovanyń málim etkenindeı, bıylǵy birinshi toqsannyń qorytyndysy boıynsha oblysta týberkýlezdiń belsendi túrimen 71 naýqas tirkeldi. Bul ótken jylǵy osy kezdegiden 13 adamǵa artyq.
- Týberkýlez boıynsha jaǵdaı alańdatarlyq. Juqpaly dert oblystyń barlyq aýdanynda tirkelip otyr. Sonymen qatar týberkýlezden ólim-jitim kórsetkishi ótken jylǵymen salystyrǵanda ózgerissiz qaldy, - dedi K.Muhıtova.
Onyń aıtýynsha, týberkýlez – áleýmettik máni bar juqpaly aýrýlardyń biri. Sondyqtan munyń aldyn alý sharalaryn kúsheıtý mańyzdy. Osy oraıda jyl saıyn profılaktıkalyq tekserýlerden (flıýorografııadan) ýaqytyly ótý, balalarǵa BTsJ vaktsınatsııasyn der kezinde alý qajet.
- Jótel, álsizdik, salmaq joǵaltý sııaqty belgiler baıqalǵan jaǵdaıda dereý dárigerge qaralǵan jón. Jeke bas gıgıenasyn saqtap, durys tamaqtaný jáne ımmýnıtetti nyǵaıtý (dene belsendiligi, taza aýada serýendeý) kerek. Sondaı-aq aýrý anyqtalǵan jaǵdaıda emdi úzbeı, tolyq qabyldaý, turǵyn úı-jaılardy jıi jeldetip, tazalyq saqtaý, qoǵamdyq oryndarda sanıtarııalyq talaptardy buzbaý mańyzdy, - dep qosty K.Muhıtova.
Eske sala keteıik, budan buryn BQO turǵynynyń sal aýrýyna shaldyqqany anyqtalǵanyn jazǵan bolatynbyz.
