Batys Qazaqstanda 7 myń adam salyq deklaratsııasyn tapsyrmaǵan

ORAL. KAZINFORM – Batys Qazaqstan oblysynda salyq deklaratsııasyn tapsyrmaǵan adamdarǵa bank esepshottary boıynsha operatsııalar júrgizý toqtatylady.

BQO boıynsha memlekettik kirister departamentinen málim etkenindeı, jyl basynan beri oblysta jalpyǵa birdeı deklaratsııalaýdyń úshinshi kezeńi aıasynda 64 myńnan astam adam (zańdy tulǵalardyń basshylary, quryltaıshylary men qatysýshylary, jeke kásipkerler, sondaı-aq olardyń jubaılary) aktıvter men mindettemeler týraly deklaratsııa tapsyrǵan.

«Deklaratsııa tapsyrý merzimi 16 qyrkúıekte aıaqtaldy. 5 qarashadaǵy málimet boıynsha oblysta 7 myń adam deklaratsııa tapsyrmaǵan. Olarǵa salyq zańnamasyna sáıkes salyqtyq esepti merziminde tapsyrmaǵany jóninde habarlamalar jiberildi. Mundaı salyq tóleýshiler habarlama alǵan sátten bastap 30 jumys kúni ishinde deklaratsııany tapsyrýy nemese sonyń sebebin túsindirýi tıis. Deklaratsııa tapsyrmaǵandarǵa Salyq kodeksiniń 118-baby 1-tarmaǵyna sáıkes bankilik esepshottar boıynsha shyǵys operatsııalaryn toqtatý jóninde sharalar qoldanylady. Adamdar salyq tóleýshiniń kabınetin (cabinet.salyk.kz), «Elektrondy úkimet» (egov.kz) portalyn jáne «e-Salyq Azamat», «eGov mobile», Kaspi.kz, Halyk, Vcc.kz.kz mobıldik qosymshalaryn paıdalana otyryp, deklaratsııany elektrondy túrde tapsyra alady», - dep habarlady vedomstvodan.

Eske sala keteıik, budan buryn BQO-da quny 714 mln teńge turatyn temeki ónimderin shekaradan qujatsyz alyp ótpek bolǵanyn jazǵan edik.