Batys Qazaqstanda 670 mln teńge turatyn kontrabandalyq taýarlardyń joly kesildi
ORAL. KAZINFORM — Batys Qazaqstan oblysynda polıtsııa qyzmetkerleri quny 670 mln teńgege jýyq kontrabandalyq taýarlardyń jolyn kesti.
BQO polıtsııa departamentiniń baspasóz qyzmetinen málim etkenindeı, uıymdasqan qylmysqa qarsy kúres basqarmasynyń qyzmetkerleri patrýldik polıtsııa batalonymen birlesip, Oral-Býzýlýk jolynda Volvo markaly eki aýyr júk kóligin toqtatqan.
«Júk kóliginiń birinde 1 348 qorapta irimshik ónimi tabyldy, ony jalǵan qujattar arqyly tuz retinde tasymaldaǵan. Іrimshiktiń quny – shamamen 320 mıllıon teńge. Ekinshi avtokólikte 1 755 qorap, (87 755 blok) nemese (877 500 paket) aktsızdik markalary joq «MILANO» markaly temeki salynǵan qoraptar tabylyp, tárkilendi. Bul taýar jalǵan qujattar boıynsha qubyrlar retinde tasymaldanǵan. Tárkilengen temekiniń shamamen quny 350 mıllıon teńgeden asady. Kúdiktiler kontrabandalyq taýarlarmen memlekettik shekaradan ótpekshi bolǵan. Tárkilengen taýardyń boljamdy jalpy somasy – 670 mıllıon teńge. Aınalymnan alyp qoıylǵan zattardyń nemese aınalymy shektelgen zattardyń kontrabandasy faktisi boıynsha qylmystyq is qozǵaldy. Qazirgi kezde tergeý amaldary júrgizilýde», dep habarlady vedomstvodan.
