Batys Qazaqstanda 65 qoı-eshki qyrylyp qaldy
ORAL. KAZINFORM — Batys Qazaqstan oblysy Shyńǵyrlaý aýdanynda usaq maldyń jappaı qyrylýy tirkeldi.
BQO Veterınarııa basqarmasynyń baspasóz qyzmetinen málim etkenindeı, oqıǵa Shyńǵyrlaý aýyldyq okrýgine qarasty Urysaı eldi mekeninde boldy.
- Qoılarǵa qandaı jyrtqyshtyń shapqany belgisiz. It, qasqyr nemese shıbóri bolýy da múmkin. Naqty anyqtalmady. Qorada úrikken qoılardyń kópshiligi tapalyp ólgen. Kúni búgin shyǵynǵa ushyraǵan qoıdyń esebi alynyp, ólekseler mal molasyna jetkizilip, joıyldy, - dep habarlady vedomstvodan.
Shyńǵyrlaý aýdandyq veterınarııa stantsııasynyń dırektory Dosqanat Saǵynbaıdyń naqtylaýynsha, oqıǵa tańǵa jaqyn bolǵan. Baqtashy aýyl turǵyndarynyń qoıyn ashyq-tesik qoraǵa qamaǵan.
- Jyrtqysh tesikten kirip, eki qoı, úsh eshkini jaraqattaǵan. Qalǵan 60-y tapalyp ólgen. Qoılardyń jartysy esepte joq bolyp shyqty. Sonymen birge 15 jyldaı mal baǵyp júrgen baqtashy aýyl ákimdigimen de, turǵyndarmen de kelisim-shartqa otyrmaǵan. Veterınarııa stantsııasynyń mamandary ákimdik qyzmetkerlerimen birlesip, ólekselerdi jınap, órteý jumystaryn atqardy. Tıisti aktiler jasaldy, - dedi D.Saǵynbaı.
Veterınar mamandardyń qaraý, tekserýi barysynda ólgen maldan asa qaýipti aýrýlarǵa kúdik baıqalǵan joq.
Eske sala keteıik, budan buryn Oral qalasy turǵynynyń qoıyn ıtter taǵy qyryp ketkenin jazǵan edik.