Batys Qazaqstanda 613 myń gektar alqapqa daqyldar egý josparlanyp otyr
ORAL. KAZINFORM – Batys Qazaqstan oblysynda bıyl 613 myń gektar alqapqa aýyl sharýashylyǵy daqyldaryn egý kózdelip otyr.
BQO aýyl sharýashylyǵy basqarmasynyń basshysy Jasulan Halıýllınniń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde 291 myń gektarǵa – dándi daqyldar, 119 myń gektarǵa – maıly daqyldar, 199 myń gektarǵa – mal azyqtyq daqyldar, 4,2 myń gektarǵa kartop, kókónis-baqsha daqyldary otyrǵyzylmaq.
Jasulan Joldybaıulynyń sózine qaraǵanda, ótken jyly 616 myń gektarǵa (2023 jyly – 623 myń) daqyldar sebilgen edi.
- Kúzgi jıyn-terin qorytyndysynda 313 myń gektar dándi daqyldar alqabynan 299 myń tonna astyq (ár gektarǵa 10,1 tsentnerden), 102 myń gektar maıly daqyldan 96,2 myń tonna (10 tsentnerden) jáne 4 myń gektardan 95 myń tonna kartop, kókónis-baqsha ónimderi alyndy. Jaqsy ónim alý úshin jańa tehnologııalar men mıneraldyq tyńaıtqyshtardy paıdalaný mańyzdy. Ótken jyldan bastap jańa tetik boıynsha otandyq zaýyttar óndiretin ammıak selıtrasy men ammofos tyńaıtqyshtarynyń quny 60 paıyzǵa sýbsıdııalanady. Bul maqsatqa 589 mln teńge bólindi, - deıdi J.Halıýllın
Onyń aıtýynsha, ótken jyly aýyl sharýashylyǵy salasyn qoldaýǵa basqarmaǵa bıýdjetten 45,7 mlrd teńge qarastyryldy, bul 2023 jylǵydan 44,6 paıyzǵa artyq. Sonyń ishinde sýbsıdııalaý baǵdarlamalary aıasynda aýyl sharýashylyǵy taýaryn óndirýshilerge 31,7 mlrd teńge sýbsıdııa tólendi.
Eske sala keteıik, budan buryn Batys Qazaqstanda sharýalar mal qystaǵyna qanshalyqty daıyn ekendigin jazǵan bolatynbyz.