Batys Qazaqstanda 600-ge jýyq adamdy ıt qapty

ORAL. KAZINFORM — Batys Qazaqstan oblysynda jyl basynan beri 702 qańǵybas ıt aýlandy.

BQO veterınarııa basqarmasy basshysynyń orynbasary Nurqaıyr Qusaıynovtyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń 340-y sterılızatsııalaýdan ótkizilip, mekendeý ortasyna keri jiberildi. 362 qańǵybas ıt turǵyndardyń ótinishi negizinde jansyzdandyryldy.

Nurqaıyr Ǵaınollaulynyń sózine qaraǵanda, bıyl qańǵybas janýarlardy aýlaý jáne sterılızatsııalaý jumystaryna oblystyq bıýdjetten 73,3 mln teńge bólindi.

— Ótken jyly bul maqsatqa 68,2 mln teńge jumsaldy. 6 925 qańǵybas ıttiń 3 885-i sterılızatsııalaýdan keıin ortasyna qaıtaryldy. 3 040-y jansyzdandyryldy, — dedi basqarma basshysynyń orynbasary.

Onyń aıtýynsha, oblys boıynsha qańǵybas úı janýarlaryn ýaqytsha ustaýǵa arnalǵan 19 panajaı bolsa, sonyń 12-si veterınarııalyq stantsııalarǵa tıesili. Aldaǵy ýaqytta oblystyq bıýdjet esebinen Oral qalasyna qarasty Krýgloozernyı kentinde syıymdylyǵy 350 oryndyq janýarlardy ýaqytsha ustaý pýnktin ashý oılastyrylýda. Qazirgi kezde bul joba boıynsha tıisti kelisimder alynyp, jobalyq-smetalyq qujattaryn daıyndaýǵa qarjy qarastyrylǵan. 

— Óńirde qańǵybas ıtterdiń kóbeıip ketýi ózekti máselelerdiń biri bolyp otyr. Osyǵan oraı turǵyndar, mekeme-uıymdardan aryz-shaǵym kóp túsedi. Oblystyq sanıtarııalyq-epıdemıologııalyq baqylaý departamentiniń derekteri boıynsha bıylǵy tórt aıda 584 adamdy ıt qapqan. Sonyń 396-sy qańǵybas ıtterden japa shekken. 406-sy Oral qalasynyń úlesine tıedi. Ótken jyly 1 902 adam ıtke qabylǵan (1 341-in qańǵybas ıt tistegen), — dedi N.Qusaıynov.

Eske sala keteıik, budan buryn Oral qalasy turǵynynyń qoıyn ıtter taǵy da qyryp ketkenin jazǵan bolatynbyz.