Batys Qazaqstanda 60-tan astam zańsyz qoqys úıindisi anyqtaldy

ORAL. KAZINFORM — Batys Qazaqstan oblysy aýmaǵynda zańsyz ornalastyrylǵan qoqys úıindilerin anyqtaý jumysy júrgizilip keledi.

BQO boıynsha ekologııa departamenti basshysynyń orynbasary Syrym Tilegenovtiń aıtýynsha, bıylǵy mamyr aıynda «Qazaqstan Ǵarysh Sapary» UK» AQ Oral jáne Aqsaı qalalarynan 100 shaqyrym radıýsta kosmostyq túsirilim jasady. Sonyń nátıjesinde Oral qalasy men Báıterek, Bórli aýdandarynan 62 zańsyz qoqys úıindisi tabyldy.

Syrym Baqtyǵalıulynyń sózine qaraǵanda, ǵaryshtyq monıtorıng qorytyndysy boıynsha ótken jyly oblys aýmaǵynda 192 stıhııalyq qoqys orny anyqtalsa, sonyń 24-i Oral qalasy, 50-i Bórli, 71-i Báıterek jáne 40-y Terekti aýdanynyń úlesine tıedi.

- Ótken jyly osyndaı 158 oryn nemese 85 paıyzy joıyldy, sonyń ishinde Oralda – 21, Bórli aýdanynda – 39, Báıterekte – 67, Terektide – 29, Tasqala men Shyńǵyrlaýda – bir-birden. Budan bólek, jeteýi anyqtalmady, bireýiniń jeke aýmaqta ornalasqany belgili boldy. 22-si – jer aktileri memlekettik jer kadastrynyń avtomattandyrylǵan aqparattyq júıesi bazasynda tirkelmegen qatty turmystyq qaldyqtar polıgony. Zańsyz ornalastyrylǵan stıhııalyq qoqys úıindileriniń tórteýi (Oralda – 2, Syrym aýdanynda – 2) joıylǵan joq, - dedi S.Tilegenov.

Onyń málimdeýinshe, Báıterek, Bórli jáne Terekti aýdanynda 22 polıgon jergilikti kadastrlyq derekterdi esepke almaǵanda, «Qazaqstan Ǵarysh Sapary» UK» AQ geoservısinde WGS-84 koordınattar júıesiniń qoldanylýyna baılanysty zańsyz qoqys tastaıtyn oryndar retinde belgilendi. Bul memlekettik bazada polıgondardyń quqyqtyq mártebesi týraly naqty aqparattyń bolmaýyna baılanysty.

- Ákimdiktermen birlesip koordınattardy naqtylaý jáne derekterdi túzetý qajet. Barlyq joıylǵan stıhııalyq úıindiler geoportalǵa rastaıtyn fotosýrettermen engiziledi, sondaı-aq jergilikti atqarýshy organdar jibergen hattarmen rastalady. Osydan keıin geoportalda jumystardyń oryndalǵanyn rastaıtyn «joıyldy» degen belgi qoıylady, - dep naqtylady departament basshysynyń orynbasary.

Eske sala keteıik, budan buryn BQO-da 150-ge jýyq qatty turmystyq qaldyqtar polıgonynyń tek 17-sine ruqsat berilgenin jazǵan bolatynbyz.