Batys Qazaqstanda 519 mln teńgege jóndelgen joldyń byt-shyty shyǵyp jatyr
ORAL. KAZINFORM — Batys Qazaqstan oblysynda Terekti-Aqsaı baǵytynda sapasyz salynǵan joldyń byt-shyty shyǵyp jatqany jóninde áleýmettik jelide aqparat jarııalandy.
BQO qoǵamdyq keńesiniń múshesi, zańger Baýyrjan Ahmetjannyń málim etkenindeı, BQO jolaýshylar kóligi jáne avtomobıl joldary basqarmasy oblystyq mańyzy bar Terekti-Aqsaı jolynyń 73-82 km ýchaskesin ortasha jóndeýge 2022 jyly 22 aqpanda «Eljas» JShS-men kelisim-shart jasaǵan. Quny – 518 mln 929,828 myń teńge.
Onyń sózine qaraǵanda, joldyń buzylǵany ótken jyly belgili bolǵan. Osyǵan oraı oblys ákimdigine hat jazylyp, sot atalǵan kompanııany kepildik mindetin oryndaýǵa májbúrlegen. Oǵan qosa bıyl memlekettik sot oryndaýshysy «Eljas» JShS-ny májbúrlep oryndatý úshin atqarýshylyq is qozǵaǵan.
Osy máseleniń anyq-qanyǵyn bilý maqsatynda Kazinform tilshisi BQO jolaýshylar kóligi jáne avtomobıl joldary basqarmasyna arnaıy saýal joldaǵan edi.
Basqarma basshysy Marat Qýanshalıev joldaǵan jaýapqa qaraǵanda, kepildendirilgen ýchaskelerdi tekserý kezinde jol tóseminiń ishinara buzylýy, kóptegen shógýler, joldyń júrý bóliginde, sonyń ishinde Bórli aýdany Pepel aýyly mańyndaǵy temirjol ótkeli aýdanynda shuńqyrlar anyqtalǵan.
- Basqarma daýdy sotqa deıin retteý tártibimen kepildik mindettemeler aıasynda anyqtalǵan aqaýlardy joıýdy talap ete otyryp, narazylyq joldady. Alaıda merdiger uıym belgilengen merzimde jumystardy oryndaýǵa kirisken joq. Sol sebepti basqarma 2025 jyly 13 maýsymda tıisti talap-aryzben sotqa júgindi. BQO mamandandyrylǵan aýdanaralyq sotynyń 2025 jylǵy 2 qyrkúıektegi sheshimimen «Eljas» JShS-ne memlekettik satyp alý týraly shart boıynsha kepildik mindettemelerin oryndaýǵa májbúrleý týraly talap-aryz qanaǵattandyryldy, - deıdi M.Qýanshalıev.
Basqarma málimetine sáıkes bıylǵy 29 sáýirde Terekti-Aqsaı avtomobıl jolynyń 73-82 km ýchaskesindegi ortasha jóndeý nysany boıynsha kepildik mindettemeler aıasynda komıssııalyq tekserý júrgizildi. Tekserý nátıjesinde «Eljas» JShS-ne anyqtalǵan aqaýlardy joıý jónindegi is-sharalar josparyn 8 mamyrǵa deıin usyný týraly hat joldandy. Áıtse de belgilengen merzimde munyń oryndalmaýyna baılanysty basqarma tarapynan is-sharalar josparyn usyný talabymen talap-shaǵym joldandy.
Nátıjesinde 2026 jylǵy 5 maýsymda is-sharalar jospary bekitilip, jumystardy oryndaý merzimi 10 maýsymnan 31 shildege deıin bolyp belgilendi.
Sonymen qatar BQO mamandandyrylǵan aýdanaralyq ekonomıkalyq sotynyń 2025 jylǵy 22 jeltoqsandaǵy atqarý paraǵyna sáıkes ádilet departamenti «Oral qalasynyń aýmaqtyq májbúrlep oryndatý bólimi» fılıalynyń memlekettik sot oryndaýshysy S.Ámireeva bıylǵy 3 maýsymda atqarýshylyq is júrgizýdi qozǵady.
Oblystyq máslıhattyń turaqty komıssııasy 8-9 shilde kúnderi avtomobıl joldaryn jóndeý nysandaryndaǵy jumystardyń oryndalý barysymen tanysý maqsatynda kóshpeli tekserý júrgizdi. Tekserý barysynda atalǵan jol ýchaskesi de qaralyp, birqatar kemshilikter anyqtaldy.
Osyǵan baılanysty 10 shildede oblys ákimi orynbasarynyń tóraǵalyǵymen, «Eljas» JShS basshylyǵynyń qatysýymen keńes ótkizildi. Keńes qorytyndysy boıynsha merdiger uıym jańa jumys óndirisi kestesin ázirlep usynýǵa jáne kelisilgen jumystardy tolyq kólemde oryndaýǵa mindetteme aldy.
- «Eljas» JShS sot sheshimine sáıkes kepildik mindettemelerin oryndaý jónindegi jumystarǵa 26 shildeden bastap kiristi. Qazirgi ýaqytta Terekti-Aqsaı jolynyń 80-shaqyrymyndaǵy temirjol ótkeli mańynda joldyń negizin resaıklırleý jáne shuńqyrlardy jóndeý jumystary júrgizilýde. Sonymen qatar nysanǵa jol-qurylys materıaldaryn tasymaldaý jumystary júzege asyrylýda, - dep qosty M.Qýanshalıev.
Eske sala keteıik, budan buryn BQO-da turǵyndar joldyń nasharlyǵyn aıtyp narazylyq bildirgenin jazǵan edik.
Sondaı-aq BQO-da joldy kútip ustamaǵan merdiger mekemege aıyppul salyndy.
