Batys Qazaqstanda 50-ge jýyq zańsyz qoqys orny anyqtaldy

ORAL. KAZINFORM — Batys Qazaqstan oblysynda «Taza Qazaqstan» respýblıkalyq ekologııalyq aktsııasy aıasynda tabıǵatty qorǵaý jáne qorshaǵan ortanyń tazalyǵyn qamtamasyz etý baǵytyndaǵy jumystar kúsheıtildi.

Batys Qazaqstanda 50-ge jýyq zańsyz qoqys orny anyqtaldy
Foto: Batys Qazaqstan oblystyq Polıtsııa departamenti

Osy baǵytta BQO polıtsııa departamenti basshylyǵynyń tapsyrmasyna sáıkes polıtseıler oblys aýmaǵyndaǵy orman alqaptaryn, saı-salalar men jol boıyndaǵy adam aıaǵy sırek basatyn aýmaqtardy jaıaý aralap, zańsyz qoqys oryndaryn anyqtaýda.

BQO polıtsııa departamentiniń baspasóz qyzmetinen málim etkenindeı, nátıjesinde oblys aýmaǵynda 50-ge jýyq stıhııalyq qoqys orny anyqtaldy.

Bulardyń 36-sy boıynsha olardy tazartý jumystaryn uıymdastyrý úshin jergilikti atqarýshy organdarǵa usynymhattar joldandy. Ákimdik pen polıtsııa arasyndaǵy ózara is-qımyldyń nátıjesinde bul aýmaqtarǵa arnaıy tehnıkalar tartylyp, jınalǵan qaldyqtar shyǵaryldy. Qalǵan qoqys oryndaryn tazartý jumystary polıtsııa qyzmetkerleriniń kúshimen júrgizildi.

Oral-Saratov avtojoly boıynda qoqys tastaýǵa arnalǵan arnaıy polıgon bolǵanyna qaramastan, belgilengen orynǵa jetpeı-aq jol jıegindegi saılarǵa qaldyqtar tógilgen. Polıtseıler osy aýmaqty jaıaý tekserý barysynda alty zańsyz qoqys ornyn tirkedi. Saılardyń ishine qurylys qaldyqtary, eski qurylys materıaldary, qańyltyrlar, avtokólik bólshekteri men traktor dóńgelekterine deıin tastalǵan. Adamdar qoqysty arnaıy polıgonǵa jetkizýdiń ornyna saılardyń ishi men jol boıyndaǵy qýystarǵa qaldyryp ketken.

Melovye gorkı aýdany mańyn tekserý barysynda taǵy 5 stıhııalyq qoqys orny belgili boldy.

Al Oral-Tasqala avtojoly boıyndaǵy qalyń orman alqaptaryn aralaý kezinde taǵy 5 zańsyz qoqys orny tabyldy. Orman ishine turmystyq jáne qurylys qaldyqtarymen qatar, qorshaý materıaldary men ózge de qajetsiz zattar tastalǵan.

Qoqys oryndaryn tazalaý úshin ákimdik tarapynan arnaıy tehnıkalar jumyldyrylyp, úıilip jatqan qaldyqtar tıisti oryndarǵa shyǵaryldy.

- Nátıjesinde buǵan deıin qoqysqa tolyp, tabıǵı kórki buzylǵan saı-salalar men jol jıekteri tazartyldy. Orman ishindegi beıbereket qaldyqtardan arylǵan aýmaqtar da óz kelbetin qaıta tapty. Osyǵan baılanysty polıtsııa qyzmetkerleri oblys turǵyndaryn turmystyq, qurylys jáne ózge de qaldyqtardy belgilenbegen jerlerge tastamaý, olardy arnaıy polıgondarǵa jetkizý kerektigin eske salady, - dep habarlady vedomstvodan.

Eske sala keteıik, budan buryn Oralda qylmys jıi tirkeletin kafeniń qyzmeti toqtatylǵanyn jazǵan edik.