Batys Qazaqstanda 49 myńǵa jýyq adam tumaýǵa qarsy ekpe aldy

ORAL. KAZINFORM — Batys Qazaqstan oblysynda tumaýǵa qarsy vaktsına salý jumystary júrgizilip jatyr. 

BQO sanıtarııalyq-epıdemıologııalyq baqylaý departamentiniń baspasóz mamany Kenjegúl Muhıtovanyń málim etkenindeı, epıdemııalyq maýsymǵa baılanysty 30 qyrkúıekten bastap turǵyndar tumaýǵa qarsy Reseı Federatsııasynda óndirilgen «Grıppol+» vaktsınasyn aldy.

Onyń sózine qaraǵanda, vaktsınatsııa barlyq emhanada, sondaı-aq qalalyq jáne aýdandyq aýrýhanalarda tegin salynyp jatyr. Jalpy, oblysqa 60 myń doza vaktsına jetkizildi. Vaktsına salýdyń basty maqsaty — halyqty tumaýdyń asqynýynan qorǵaý jáne aýrýdyń taralýyn azaıtý.

— Naýqan bastalǵannan beri óńirde 48 611 adam, ıaǵnı vaktsına alýǵa tıisti turǵyndardyń 81,03 paıyzy ekpe aldy. Ekpe salý osy aıdyń sońyna deıin jalǵasady, — deıdi Kenjegúl Muhıtova.

Onyń aıtýynsha, eń aldymen medıtsına qyzmetkerleri, emdeý mekemelerinde esepte turǵan jáne jıi aýyratyn balalar, balalar úıiniń tárbıelenýshileri men qarttar úıindegi qarııalar, sozylmaly aýrýlary bar eresekter ekpe alyp jatyr.

Sonymen qatar epıdemıologııalyq kórsetkishter boıynsha júkti áıelder, mektep oqýshylary, joǵary jáne orta oqý oryndarynyń stýdentteri men qyzmetkerleri naýqannan tys qalmaıdy.

Mamandar ekpe alý arqyly tumaýdyń aýyr túrlerinen jáne asqynýlarynan (pnevmonııa, bronhıt, otıt jáne basqa) saqtanýǵa bolatynyn eske salady.

Departament málimeti boıynsha qazan aıy bastalǵannan beri oblysta 9 918 adamnyń jiti respıratorlyq vırýstyq ınfektsııalarmen (JRVI) aýyrǵany tirkeldi. Sonyń 6 841-i nemese 68,9 paıyzy 14 jasqa deıingi balalar bolsa, 118-i — 1 jasqa deıingi sábı. Jeteýi — júkti áıel.

Eske sala keteıik, budan buryn Batys Qazaqstanda 2 myńdaı adamdy ıt pen mysyq tistegenin jazǵan edik.