Batys Qazaqstanda 465 órt oqıǵasynyń teń jartysynan astamy turǵyn úıde tirkelip otyr

ORAL. KAZINFORM — Batys Qazaqstan oblysynda jyl basynan beri 465 órt bolyp, sonyń saldarynan 9 adam qaza taýyp, úsheýi túrli jaraqat aldy.

BQO TJD bastyǵynyń orynbasary Eldos Battalovtyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde turǵyn úı sektorynda 247 órt oqıǵasy (ótken jyly osy merzimde – 240, ósim – 2,4 paıyz) tirkeldi, bul – barlyq órttiń 53,1 paıyzy.

Eldos Nurlanulynyń sózine qaraǵanda, ótken jylytý maýsymy kezeńinde turǵyn úıde 186 órt bolyp, aldyńǵy maýsymdaǵydan (175) 6,2 paıyzǵa asyp tústi. 4 adam (2023-2024 jylǵy maýsymda – 4) mert bolyp, jeteýi (3) jaraqat aldy. Órt bolmasa da, bir adam gazdan ýlandy. 
Órt sany, ásirese, Terekti (+11), Báıterek (+5), Bókeı ordasy (+4), Jańaqala (+4) jáne Jánibek (+5) aýdanynda aıtarlyqtaı artyp otyr.

- Taldaý órttiń kóbinese elektr jabdyqtaryn tehnıkalyq paıdalaný qaǵıdalaryn buzý, peshterdi paıdalaný kezinde órt qaýipsizdigi erejelerin saqtamaý, abaısyzdyq, qasaqana órt qoıý, balalardyń otpen oınaýynan shyǵatynyn kórsetip otyr. Aldaǵy jylytý maýsymy kezinde oqys oqıǵalardyń aldyn alý maqsatynda eki kezeńde reıdtik is-sharalar júrgiziledi. Birinshi kezeń 15 tamyzdan 15 qyrkúıekke deıin, ekinshisi jylý berý aıaqtalǵanǵa sozylady, - dedi E.Battalov.

Eske sala keteıik, budan buryn Oralda sút kombınatynyń ǵımaraty órtengenin jazǵan edik.