Batys Qazaqstanda 431 bilim berý uıymynda órt qaýipsizdigi saqtalmaǵan
ORAL. KAZINFORM – Batys Qazaqstan oblysynda prokýratýra organdary teksergen kezde bilim berý uıymdarynda órt qaýipsizdigi erejelerin, sanıtarlyq-epıdemıologııalyq talaptardy, nysandardy terrorızmge qarsy qorǵaýdy uıymdastyrý talaptaryn kóptegen buzýshylyqtar, sondaı-aq jalǵan dıplomdardy qoldaný men balalarǵa qatygezdik kórsetý derekteri anyqtaldy.
Oblys prokýrorynyń aǵa kómekshisi Janar Imanǵalıevanyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde 431 bilim berý uıymynda órt qaýipsizdigi erejeleriniń talaptary buzylǵan.
Janar Ómirǵalıqyzynyń sózine qaraǵanda, atalmysh mekemelerde avtomatty órt dabylynyń durys jumys istemeýi, evakýatsııalaý joldarynda qoldanylatyn «Shyǵý», «Evakýatsııalyq (rezervtik) shyǵý» kólemdi órt qaýipsizdigi belgileriniń bolmaýy, órt avtomatıkasynyń júıeleri men qondyrǵylaryn tehnıkalyq tekserýden ótkizbeý sııaqty buzýshylyqtarǵa jıi jol berilgen.
«Oǵan qosa 414 uıymda sanıtarlyq erejelerdi buzýǵa jol berilgen. 52 jeke jáne 13 memlekettik balabaqshanyń as blogynda, sondaı-aq daıyn tamaq óniminen alynǵan synamalarda ishek taıaqshalary tobynyń bakterııalary bar ekeni anyqtaldy. Sonymen qatar temperatýrany saqtamaı, taǵamdy tońazytqyshtarda saqtaýǵa ruqsat etilgen, balalarǵa arnalǵan jıhazdar tozǵan kúıde, kóptegen buzylýlar men aqaýlar bar. Uıyqtaý kerek-jaraqtary ýaqtyly aýystyrylmaǵan, jumysshylardyń medıtsınalyq qujattary joq. Úsh saǵat buryn daıyndalǵan taǵamdardy qoldanýǵa ruqsat etilgen», - deıdi J.Imanǵalıeva.
Oblys prokýrory aǵa kómekshisiniń aıtýynsha, 52 bilim berý uıymynda kameralar aqaýly jaǵdaıda bolǵan.
Onyń ústine úsh balabaqshada balalarǵa júıeli túrde qatygezdik kórsetý jáne bilim berýdiń ruqsat etilmegen ádisterin qoldaný derekteri anyqtaldy. Beınebaqylaý kameralarynyń jazbalaryn zerdeleý barysynda balabaqsha tárbıeshileriniń balalarǵa júıeli túrde dóreki qarym-qatynas jasaǵany belgili boldy.
«Atalǵan faktiler prokýratýramen sotqa deıingi tergep-tekserýlerdiń biryńǵaı tizilimine Qylmystyq kodekstiń 140-babynyń 2-bóligimen (kámeletke tolmaǵan adamdy tárbıeleý jónindegi mindetterdi ata-anasynyń nemese ózine osy mindetter júktelgen ózge adamnyń, sol sııaqty pedagogtiń nemese oqý, tárbıeleý, emdeý mekemesiniń nemese kámeletke tolmaǵan adamdy qadaǵalaýdy júzege asyrýǵa mindetti ózge mekemeniń basqa da jumyskeriniń kámeletke tolmaǵan adamǵa qatygezdik tanytýymen ulasqan oryndamaýy nemese tıisinshe oryndamaýy) tirkeldi.
Sotqa deıingi tergep-tekserý nátıjeleri boıynsha qylmystyq ister taraptardyń tatýlasýyna baılanysty toqtatyldy. Balabaqsha tárbıeshileri jumystan bosatyldy», - dedi J.Imanǵalıeva.
Sondaı-aq kórineý jalǵan dıplomdy paıdalanǵany úshin 1 adamǵa qatysty Qylmystyq kodekstiń 385-baby boıynsha sot úkimi shyqty. Úkim zańdy kúshine engen joq.
«90 bilim berý uıymynda pornografııalyq jáne ekstremıstik sıpattaǵy saıttarǵa, sondaı-aq zorlyq-zombylyq, qumar oıyndar, esirtki jáne alkogol ónimderi týraly aqparatqa kedergisiz qol jetkizý derekteri belgili boldy. Qadaǵalaý aktileri boıynsha mundaı saıttarǵa kirýge tyıym salyndy, kináliler ákimshilik jaýapkershilikke tartyldy. Qoryta aıtqanda, qabyldanǵan sharalarmen 71 myń balanyń quqyǵy qorǵaldy, 236 adam tártiptik, 262-si ákimshilik jaýapkershilikke tartyldy. Barlyq buzýshylyqtar boıynsha bilim berý uıymdary olardy joıý sharalaryn qabyldady», - dedi BQO prokýrorynyń aǵa kómekshisi.
Eske sala keteıik, budan buryn áleýmettik jelide synǵa ilikken BQO tabıǵatty qorǵaý prokýrorynyń qyzmetinen bosatylǵanyn jazǵan bolatynbyz.
