Batys Qazaqstanda 430 boryshker ákimshilik qamaqqa alyndy

ORAL. KAZINFORM – Batys Qazaqstan oblysynda ótken jyly májbúrlep oryndatý salasy boıynsha 645 boryshkerge qatysty ákimshilik quqyq buzýshylyq týraly ister qozǵaldy.

BQO ádilet departamenti basshysynyń orynbasary Estaı Rashqalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, sonyń nátıjesinde 173 boryshkerge aıyppul salynsa, 430-y ákimshilik qamaqqa alyndy.

Estaı Eltaıulynyń sózine qaraǵanda, 2024 jyly sot oryndaýshylarynyń óndirisinde 152,7 mlrd teńgeniń 296 954 atqarýshylyq is júrgizý qujaty boldy. Sonyń 51,5 mlrd teńge bolatyn 125 851 qujaty oryndaldy.

- Sot aktilerin oryndaýdan qasaqana jaltarý QR qylmystyq nemese ákimshilik zańnamalaryna sáıkes jaýaptylyqqa ákep soǵady. Osy oraıda prokýratýra, polıtsııa jáne jeke sot oryndaýshylary óńirlik palatasymen birlesken jumystar atqarylýda. Atap aıtqanda, ótken jyly sot oryndaýshylarynyń usynymdary negizinde 4 boryshker QR QK 139-babyna sáıkes sot úkimimen qylmystyq jaýapkershilikke tartyldy. 8 qylmystyq is taraptardyń tatýlasýymen toqtatylsa, 17-si aldyn ala tergeý satysynda qaralýda, - dedi E.Rashqalıev.

Onyń aıtýynsha, ákimshilik jaýapkershilikke tartylǵan adamdar aldyńǵy jylmen salystyrǵanda, 54,2 paıyzǵa nemese 295 iske kóbeıgen. Ákimshilik qamaqqa alynǵandar 50,6, aıyppul salynǵandar 58,9 paıyzǵa ósken.

- 2024 jyly alıment tólemderi boıynsha bereshegi bar azamattardy jumysqa ornalastyrý úshin jumys oryndarynyń 20 jármeńkesi ótkizildi. Sonyń nátıjesinde 462 boryshker jumyspen qamtyldy. Bir jylda osy sala boıynsha sot oryndaýshylaryna qatysty 125-ten astam aryz-shaǵym túsken, - dedi departament basshysynyń orynbasary.

Eske sala keteıik, budan buryn kútimsiz joldan zardap shekken Oral turǵyny zalaldy ákimdikten óndirgenin jazǵan bolatynbyz.