Batys Qazaqstanda 43 myńnan astam adam turǵyn úı kezeginde tur
ORAL. KAZINFORM – Batys Qazaqstan oblysynda «Otbasy bank» AQ resmı saıtynyń derekteri boıynsha bıylǵy 1 naýryzdaǵy málimetke sáıkes turǵyn úı kezeginde turǵandar sany – 43 663 adam.
BQO energetıka jáne turǵyn úı-kommýnaldyq sharýashylyq basqarmasy basshysynyń orynbasary Qanat Ómirálıevtiń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde 28 812-si Oral qalasy, 14 851-i oblys aýdandarynyń úlesine tıedi. Jeńildikke ıe sanattar boıynsha áleýmettik jaǵynan osal toptarǵa jatatyndar – 11 424 adam.
Qanat Amangeldiulynyń sózine qaraǵanda, ótken jyly jáne bıylǵy úsh aıda kommýnaldyq turǵyn úı qorynan 431 otbasy baspanamen qamtylsa, sonyń 326-sy halyqtyń áleýmettik osal toptaryna kiredi. Sondaı-aq 2025 jyly qurylysy aıaqtalǵan 580 jaldamaly turǵyn úı qoldanysqa berildy. Qazirgi tańda «Otbasy bank» AQ tarapynan 512 turǵyn úıdi bólý rásimderi júrgizilip jatyr.
- Jeke turǵyn úı qorynan jalǵa alynǵan turǵynjaı úshin jaldaý aqysynyń bir bóligin sýbsıdııalaý boıynsha 2025 jyly 50 mln teńge bólinip, 190 azamatqa kómek kórsetildi. 2026 jylǵa da oblystyq bıýdjetten 50 mln teńge qaraldy. Turǵyn úı qurylysy jınaq aqshasy júıesi arqyly jeńildikti ıpotekalyq turǵyn úı qaryzdaryn berý boıynsha «Otbasy bank» AQ arqyly 2025 jyly «2-10-20» jáne «5-10-20» ıpotekalyq baǵdarlamalar aıasynda Oral qalasynda 5 kópqabatty turǵyn úı berilip, 390 otbasy pátermen qamtyldy. Sonymen qatar bıyl «Otbasy bank» AQ arqyly 630 páterdi bólý boıynsha konkýrstyq rásimder júrgizilip jatyr, - dedi Q.Ómirálıev.
Onyń aıtýynsha, baspana satyp alý kezinde ıpotekalyq turǵyn úı qaryzdary boıynsha bastapqy jarnanyń bir bóligin jabý úshin Qazaqstan Respýblıkasynyń azamattaryna beriletin aqshalaı mindetteme boıynsha oblystyq bıýdjetten ótken jyly 290 mln teńge bólinip, 195 azamatqa kómek kórsetildi. 2026 jylǵa 480 mln teńge kóleminde bıýdjet qarajaty qarastyryldy.
- Turǵyn úıdi bólý úderisiniń uzaqqa sozylýynyń negizgi sebebine toqtalsaq, túgendeý barysynda keıbir adamdar muny alaıaqtyq áreket dep qabyldap, ýaqytynda jaýap bermeıdi, - dep qosty basqarma basshysynyń orynbasary.
Eske sala keteıik, budan buryn Batys Qazaqstanda turǵyn úı qurylysy qalaı júrgizilip jatqanyn jazǵan edik.
