Batys Qazaqstanda 400 tonna pishen órtenip ketti

ORAL. KAZINFORM — Batys Qazaqstan oblysy Syrym aýdany Alǵabas aýylynda bolǵan órt oqıǵasy týraly áleýmettik jelide beınejazba jarııalandy.

Aýyl turǵynynyń sózine qaraǵanda, úsh saǵat boıy kútkenimen, órt sóndirýshiler kelmegen.

— Aýyldarda órtke qarsy eshqandaı daıyndyq joq. Ózimiz alysqanymyzben, eshteńe shyǵara almadyq. 1 500 rýlon pishen, 3 bazamyz órtenip ketti, — deıdi Alǵabas aýylynyń turǵyny.

BQO TJ departamenti baspasóz qyzmetiniń naqtylaýynsha, Alǵabas aýylynda eki mekenjaı boıynsha órt bolyp jatqany jóninde 2 qyrkúıek kúni saǵat 04.49-da habar túsken.

Abylaı han kóshesi 5/1-mekenjaıynda 240 sharshy metr qora-qopsyǵa qosa 1 500 rýlon shóp (375 tonna), 10 tonna iri mal azyǵy jáne 4 tonna dızeldi otyn janyp ketken. 

Oǵan qosa Abylaı han kóshesi 5/2-mekenjaıynda 240 sharshy metr qora-qopsy, 100 rýlon pishen (25 tonna) otqa orandy. 

— Órt 3 qyrkúıek kúni saǵat 02.41-de oqshaýlanyp, saǵat 06.10-da sóndirildi. Zardap shekkender joq. Qazirgi kezde órttiń shyǵý sebebi, keltirilgen shyǵyn anyqtalý ústinde, — dep habarlady vedomstvodan.

Eske sala keteıik, budan buryn Batys Qazaqstanda 465 órt oqıǵasynyń teń jartysynan astamy turǵyn úıde tirkelip otyrǵanyn jazǵan edik.