Batys Qazaqstanda 400 mln teńgeden astam alıment bereshegi óndirildi

ORAL. KAZINFORM — Batys Qazaqstan oblysynda jyl basynan beri 80 myńnan astam adamnyń quqyǵy qalpyna keltirildi.

BQO prokýrory Serik Shalabaevtyń málim etkenindeı, sonyń ishinde balalar quqyǵyn qorǵaý erekshe nazarda. 

Serik Rysqalıulynyń sózine qaraǵanda, alıment tólemeýshilik eń ótkir áleýmettik máselelerdiń biri bolyp qalyp otyr.

- Tek bıylǵy jyly prokýratýranynyń aralasýymen 5 qylmystyq, 111 ákimshilik is qozǵaldy. 1 myńnan astam balaǵa qatysty 400 mln astam alıment bereshegi óndirildi, - dedi oblys prokýrory. 

Onyń aıtýynsha, taǵy bir mańyzdy baǵyt – ınvestıtsııalyq jobalardy qoldaý. Bul – Memleket basshysynyń tikeleı tapsyrmasy. Front-ofıs alańynda barlyq ýákiletti organdarmen birlese otyryp, 180 mlrd teńge bolatyn 15 jobany júzege asyrýǵa kómek berildi. Sonyń nátıjesinde 1,5 myńnan astam adam jumyspen qamtylyp, bıýdjetke 8 mlrd astam teńge tústi.

- Bul – jaı ǵana sandar emes. Bul – ár otbasyna kelgen turaqtylyq, ár azamattyń erteńine degen senimi. Alaıda qoǵamdaǵy tynyshtyq tek ekonomıkamen ólshenbeıdi. Qaýipsizdik – kez kelgen órkenıetti memlekettiń irgetasy. Sol sebepti qylmystyń aldyn alý – bizdiń basty mindetterimizdiń biri, - dedi S.Shalabaev.

Eske sala keteıik, budan buryn BQO-da prokýratýranyń aralasýymen 468,5 mln teńgeniń memleketke qaıtarylǵanyn jazǵan bolatynbyz.