Batys Qazaqstanda 365 myń tonna astyq jınaldy

ORAL. KAZINFORM — Batys Qazaqstan oblysynda 285,3 myń gektarǵa egilgen dándi daqyldar tegisteı oryldy. 

BQO aýyl sharýashylyǵy basqarmasy basshysynyń orynbasary Rústem Zulqashevtiń málim etkenindeı, ár gektarǵa 12,8 tsentnerden kelip, 365 myń tonna astyq jınaldy.

Rústem Múlkáıulynyń sózine qaraǵanda, bıyl 137 myń gektarǵa maıly daqyldar egilse, sonyń orylǵan 85 myń gektary nemese 63 paıyzynan 68,3 myń tonna ónim tústi. Ár gektarǵa 8,1 tsentnerden aınalyp otyr.

— Sonymen qatar 14,8 myń tonna kartop, 19 myń tonna kókónis, 21 myń tonna baqsha ónimderi alyndy. Qazirgi tańda egin orý jumystary jalǵasyp jatyr, — dedi R.Zulqashev.

Onyń aıtýynsha, egis qurylymyn ártaraptandyrý aıasynda bıdaı alqaby 187 myń gektar bolsa, maıly daqyldar 35 myńǵa kóbeıtilip, 137 myń gektarǵa jetti. Sol sekildi mal azyqtyq daqyldar 8,9 myń gektarǵa ulǵaıtylyp, 208,8 myń gektar boldy.

Bıyl óńirdegi aýyl sharýashylyǵy taýaryn óndirýshilerge kúzgi dalalyq jumystardy atqarý úshin 11,8 myń tonna (shildede — 3,1 myń, tamyzda — 3,9 myń, qyrkúıekte — 4,3 myń, qazanda — 0,5 myń tonna) arzandatylǵan dızel otyny bólindi.

— Bul rette Atyraý munaı óńdeý zaýytynan jetkizýshi-operator retinde «Neftek Operating» JShS anyqtalyp, Oral qalasyndaǵy munaı bazasynan dızel otynyn jiberý baǵasy lıtrine 242 teńge bolyp bekitildi. Qazirgi tańda aýyl sharýashylyǵy qurylymdarymen 10,1 myń tonna dızel otynyna kelisim-shart jasalyp, sonyń 4,9 myń tonnasy satyp alyndy. Kúzgi dala jumystaryna 5 312 traktor, 911 kombaın, 3 711 tirkeme jáne ózge de tehnıkalar tartylǵan, — dedi basqarma basshysynyń orynbasary.

Aýyl sharýashylyǵy basqarmasynyń derekterine sáıkes arnaıy lıtsenzııasy bar 8 astyq qabyldaý kásiporny Báıterek, Bórli, Terekti, Tasqala, Shyńǵyrlaý aýdandary men Oral qalasynyń aýmaǵynda ornalasqan. 

Egin oraǵy bastalar aldynda astyq qabyldaý kásiporyndary aýmaqty tazartý, qoımalardy óńdeý (gazatsııa) jumystaryn júrgizdi, sondaı-aq avtomobıl jáne vagon tarazylaryn jyl saıynǵy metrologııalyq tekserýden jáne zerthana jabdyqtaryn tıisti baǵalaýdan ótkizýdi aıaqtady. Osy kásiporyndardyń jalpy syıymdylyǵy — 586 myń tonna. Budan bólek aýyl sharýashylyǵy taýaryn óndirýshilerinde sharýashylyq janyndaǵy astyq qoımalary bar. 

— Kúni búgin oblystaǵy astyq qabyldaý kásiporyndarynda 120 myń tonna astyq saqtalýda. Atalmysh kásiporyndar shtattyq rejımde jumys isteýde. Oǵan qosa aldaǵy jyldyń qamy úshin 79 myń gektar alqapqa kúzdik dándi daqyldar egildi, — dedi R.Zulqashev.

Eske sala keteıik, budan buryn batysqazaqstandyq dıqandardyń egin orýǵa kiriskenin jazǵan edik.