Batys Qazaqstanda 3,5 myń gektar aýyl sharýashylyǵy jeri memleket menshigine qaıtaryldy

ORAL. KAZINFORM — Óńirde aýyl sharýashylyǵyna arnalǵan jalǵa zańsyz berilgen 3 456 gektar jer memleket menshigine qaıtaryldy. Bul týraly AShM málim etti.

BQO Baıterek aýdany ákimdigine qatysty QR AShM Jer resýrstaryn basqarý komıtetiniń Batys Qazaqstan oblysy boıynsha departamenti júrgizgen jospardan tys tekserý barysynda quqyq buzýshylyq faktisi anyqtaldy.

Tekserý nátıjesinde jer ýchaskesi Jer kodeksiniń talaptaryn buza otyryp, JShS-ne berilgeni belgili boldy. Atap aıtqanda, Kodekstiń 43-1-babynda kózdelgendeı, ýaqytsha óteýli jer paıdalaný quqyǵy tek konkýrs negizinde beriliýi tıis bolsa da, konkýrs rásimi saqtalmaǵan.

Soǵan qaramastan, jergilikti atqarýshy organ zańsyz qaýly qabyldap, standartty jalǵa berý shartyn jasasqan. Bul ýákiletti organnyń aralasýyna negiz boldy.

Materıaldardy qaraý qorytyndysy boıynsha Batys Qazaqstan oblysynyń mamandandyrylǵan aýdanaralyq ekonomıkalyq soty jasalǵan jalǵa alý shartyn jaramsyz dep tanyp, jer ýchaskesin memleket menshigine qaıtarý týraly sheshim qabyldady.

Bul shara jer qatynastary salasyndaǵy zańdylyqty qamtamasyz etý, aýyl sharýashylyǵy jerlerin zańsyz berýdi anyqtaý jáne jolyn kesý, sondaı-aq olardyń tıimdi paıdalanylýyn arttyrýǵa baǵyttalǵan júıeli jumystyń bir bóligi bolyp tabylady.