Batys Qazaqstanda 32 myńǵa jýyq adam turǵyn úı kezeginde tur
ORAL. KAZINFORM — Batys Qazaqstan oblysynda qazirgi ýaqytta memlekettik turǵyn úı qorynan páter alý úshin 31 960 adam kezekte tursa, sonyń ishinde 18 788-i – halyqtyń áleýmettik osal toptaryna jatatyndar, 4 173-i – kóp balaly otbasylar.
BQO energetıka jáne turǵyn úı-kommýnaldyq sharýashylyq basqarmasynyń basshysy Mıras Múlkáıdiń Kazinform tilshisine málim etkenindeı, bıyl 1 tamyzǵa deıin oblys boıynsha 124 adam kezektilik tártibimen turǵyn úımen qamtamasyz etildi.
Onyń sózine qaraǵanda, sonyń ishinde altaýy – jalǵyz baspanasy apatty dep tanylǵandar, altaýy – memlekettik jáne bıýdjettik uıym qyzmetkerleri, 112-si – áleýmettik osal topqa jatatyndar, bulardyń arasynda kóp balaly, tolyq emes otbasylar, múgedek bala tárbıelep otyrǵandar, 1 jáne 2 toptaǵy múgedekter, jetim nemese ata-ana qamqorlyǵynsyz qalǵan balalar, jasy boıynsha zeınetke shyqqandar, Ekinshi dúnıejúzilik soǵys ardagerlerine teńestirilgen jáne basqa memleketter aýmaǵynda áskerı is-qımylǵa qatysqan ardagerler bar.
«Bıyl turǵyn úı sertıfıkattaryn berý úshin oblystyq bıýdjetten 400 mln teńge qarastyrylsa, sonyń 240 mln teńgesi – Oral qalasyna, 50 mln teńgesi Bórli, 10 mln teńgeden basqa aýdandarǵa bólindi. Qazirgi tańda 75 azamatqa 72 mln 005,96 myń teńgeniń turǵyn úı sertıfıkattary berildi», - deıdi M.Múlkáı.
Basqarma basshysynyń aıtýynsha, halyqtyń áleýmettik osal toptary úshin turǵyn úıdi jaldaý aqysy sýbsıdııalanady.
QR Indýstrııa jáne ınfraqurylymdyq damý mınıstriniń 2022 jylǵy 8 aqpandaǵy № 60 buıryǵymen bekitilgen jeke turǵyn úı qorynan jalǵa alynǵan turǵyn úı úshin azamattardyń jekelegen sanattaryna tólemderdi taǵaıyndaý jáne júzege asyrý qaǵıdalaryna sáıkes 4 sanat boıynsha kezekte turǵandar (1 jáne 2 toptaǵy múgedekter, múgedek balalary bar nemese olardy tárbıelep otyrǵan otbasylar, jetim balalar, kóp balaly otbasylar) turǵyn úıge muqtaj adamdar esebinde ótemaqy túrinde óteýsiz negizde tólem alýǵa múmkindigi bar.
«Jeke turǵyn úı qorynan jalǵa alynǵan turǵyn úı úshin tólemder bıýdjet qarajaty esebinen teńgerimdi negizde 50 paıyz jáne alýshydan 50 paıyz túrinde júzege asyrylady. 2024 jyly jaldaý aqysyn sýbsıdııalaý boıynsha tólemderdi júrgizý úshin oblystyq bıýdjetten 50 mln teńge bólindi. 26 aqpanda "Otbasy bank"AQ-men shart jasaldy. Kúni búginge deıin "Otbasy bank" AQ derekterine sáıkes azamattarmen 174 jaldaý sharty tirkelip, 4,9 mln teńge ıgerildi», - dedi M.Múlkáı.
Eske sala keteıik, budan buryn Oral qalasynda jylý jelileriniń teń jartysy tozǵanyn jazǵan edik.
