Batys Qazaqstanda 30-dan astam túlek memlekettik laýazymdarǵa tikeleı ornalasty

ORAL. KAZINFORM — Memleket basshysynyń tapsyrmasyn oryndaý maqsatynda 2022 jyldyń jeltoqsan aıynda memlekettik qyzmetke kirýde artyq kedergilerdi joıý tártibin jeńildetý boıynsha qoldanystaǵy zańnamaǵa tıisti ózgerister engizildi.

QR Memlekettik qyzmet isteri agenttigi BQO boıynsha departamentiniń basshysy Murat Baısalovtyń óńirlik kommýnıkatsııalar qyzmeti alańynda ótken brıfıngte málim etkenindeı, endi memlekettik grantpen oqý oryndaryn joǵary kórsetkishpen aıaqtaǵan úzdik túlekter aýdan men aýyldyq jerlerde tómengi laýazymdarǵa konkýrstyq irikteýsiz, tikeleı taǵaıyndalatyn bolady.

Onyń sózine qaraǵanda, bul bilikti jastardy memlekettik qyzmetke yntalandyrýǵa, jas mamandardyń aýdan men aýylǵa oralýyna, sonymen qatar óńirlerdegi kadr tapshylyǵyn azaıtýǵa septigin tıgizip, memlekettik qyzmetke kirýdi jeńildetedi.

«Norma engizilgennen bastap Batys Qazaqstan oblysynda memlekettik laýazymdarǵa joǵary oqý ornyn bitirgen 31 túlek (ótken jyly – 9, bıyl – 22) ornalasty. Qazirgi tańda olar óz qyzmetterin atqarýda», deıdi M.Baısalov.

Onyń aıtýynsha, departament memlekettik qyzmetshilerdiń quqyǵyn qorǵaýshy organ retinde turaqty negizde jumys júrgizip keledi. Bıylǵy jeti aıda 11 memlekettik qyzmetshige zańnama talaptary saqtalmaı qoldanylǵan tártiptik jazalardyń kúshteri joıylyp, olardyń buzylǵan zańdy quqyqtary qalpyna keltirildi.

«Oǵan qosa jekelegen memlekettik organdardyń qyzmetshileri jumys ornynda ústeme jumysqa tartý týraly jumys berýshiniń buıryǵy rásimdelmeı, otyrǵandary anyqtalyp, monıtorıng nátıjesi boıynsha 133 memlekettik qyzmetshiniń quqyqtary qalpyna keltirilip, olarǵa demalys ýaqyty usynyldy jáne tıisti tólemder júrgizildi. Sondaı-aq tekserý nátıjesinde ekinshi toptaǵy múgedektigi bar 6 memlekettik qyzmetshiniń quqyǵy buzylǵany belgili boldy. Olarǵa apta saıynǵy 36 saǵattyq jumys ýaqyty belgilenip, artyq jumys saǵat atqarǵany úshin jalpy 20 kún demalys ýaqyty berildi, 91 450 teńge kóleminde ótemaqy tólendi», deıdi departament basshysy.

Departament málimetine qaraǵanda, óńirdegi jergilikti atqarýshy organdardyń memlekettik qyzmetshilerine issapar shyǵyndaryn tóleý talaptarynyń saqtalýyna júrgizilgen taldaý nátıjesinde issapar shyǵyndaryn ýaqytyly tólemegen 60 memlekettik qyzmetshige tıisti 3 mln 600 myń teńge kóleminde tólemder júrgizildi. Eńbek demalysy tólemderi keshiktirilip tólengeni úshin 67 memqyzmetshige 90 myń teńge kóleminde ósimpul tólendi.

Sol sekildi keıbir memlekettik organdar zańnama talaptaryn durys qoldanbaı, memlekettik qyzmetshilerge tólenýge tıisti bonýstardy tólemegen. Atap aıtqanda, 22 memlekettik qyzmetshige negizsiz berilmegen 4 mln 316,062 myń teńge bonýs tólendi.

Eske sala keteıik, budan buryn Batys Qazaqstan oblysynda óńirlik kadr rezervi qalyptastyrylǵanyn jazǵan bolatynbyz.