Batys Qazaqstanda 30-dan astam adamnyń tumaýmen aýyrǵany rastaldy
ORAL. KAZINFORM — Batys Qazaqstan oblysynda jyl basynan beri 95 078 adamnyń jiti respıratorlyq vırýstyq ınfektsııa (JRVI) juqtyrǵany tirkeldi.
BQO sanıtarııalyq-epıdemıologııalyq baqylaý departamenti basshysy orynbasarynyń mindetin atqarýshy Mıra Qaýymbaevanyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń 63 500-i — 14 jasqa deıingi balalar.
Mıra Nurlanqyzynyń sózine qaraǵanda, ótken jyldyń osy kezeńimen salystyrǵanda, JRVI-men syrqattanýshylyq 21,38 paıyzǵa tómendedi.
— Kúni búginge deıin oblysta 32 adamnyń tumaýmen aýyrǵany tirkeldi. Barlyq derek zerthanalyq zertteýler nátıjesinde rastaldy. JRVI men tumaýdyń taralýyn boldyrmaý maqsatynda óńirde kúndelikti epıdemıologııalyq monıtorıng júrgizilip, medıtsınalyq uıymdardaǵy jaǵdaı turaqty baqylaýǵa alyndy, — dedi M.Qaýymbaeva.
Onyń aıtýynsha, bıylǵy epıdemıologııalyq maýsymǵa Batys Qazaqstan oblysynda tumaýǵa qarsy 68 myń doza vaktsına alý josparlanǵan. Vaktsınatsııa eń aldymen tumaýmen aýyrǵan kezde asqyný qaýpi joǵary azamattardy qorǵaýǵa baǵyttalǵan. Olardyń qatarynda medıtsına qyzmetkerleri, medıtsınalyq baqylaýdaǵy balalar, júkti áıelder, sozylmaly aýrýlary bar azamattar jáne basqa da qaýip toptaryna jatatyn adamdar bar. Oǵan qosa turǵyndar ekpeni aqyly túrde ala alady.
Tumaýǵa qarsy vaktsınatsııa — aýrýdyń aldyn alýdaǵy mańyzdy is-sharalardyń biri. Sonymen qatar adam egilgennen keıin de jeke profılaktıka talaptaryn saqtaýy qajet.
Eske sala keteıik, budan buryn vırýstyq gepatıttiń adam densaýlyǵy úshin qanshalyqty qaýipti ekendigin jazǵan bolatynbyz.
