Batys Qazaqstanda 3 400-den astam adam jelsheshekpen aýyrǵan
ORAL. KAZINFORM — Batys Qazaqstan oblysynda birqatar juqpaly aýrýmen syrqattanýshylyqtyń óskeni baıqalady.
BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń Kazinform tilshisine málim etkenindeı, bıylǵy on aıda eki adam epıdemıologııalyq parotıtke shaldyqqan. Ótken jyly osy merzimde bul dert tirkelmegen edi.
Nurlybek Ermekulynyń sózine qaraǵanda, sondaı-aq bıyl 451 adam skarlatınany (ótken jyly osy ýaqytta – 339), 3 387-si (2 894) jelsheshekti, 189-y (21) tumaýdy juqtyrǵan.
- Barlyq aýa-tamshy jolymen beriletin aýrýlardyń aldyn alý úshin medıtsınalyq kómekke ýaqytyly júginý qajet. Adam ózin-ózi emdemeı, tek dárigerdiń nusqaýy boıynsha em qabyldaǵany mańyzdy. Naýqas balalardy mektepter men balabaqshalarǵa jibermeý usynylady. Óńirde JRVI-diń órshýine baılanysty onlaın oqýǵa kóshken mektepter joq, - dedi N.Mustaev.
Onyń aıtýynsha, jiti ishek juqpalary jáne parazıttik aýrýlardan salmonellez ótken jylǵy 48-den bıyl 88-ge, rotavırýstyq enterıt 12-den 90-ǵa, askarıdoz 98-den 117-ge, enterobıoz 180-nen 239-ǵa, qyshyma 18-den 31-ge, dermatomıkozdar 63-ten 94-ke jetken.
Degenmen 2025 jyly jiti ishek juqpalarynyń toptyq aýrýshańdylyǵy jáne jappaı ýlaný tirkelgen joq. Epıdemıologııalyq tekserý barysynda ishek juqpalary men parazıttik aýrýlardyń turmystyq baılanys arqyly berilgeni jáne juqtyrý kózi tolyq termııalyq óńdeýden ótpegen taǵam ekendigi anyqtaldy.
- Bul dertterdiń aldyn alý úshin jeke bas gıgıenasyn saqtap, qoldy muqııat jýý qajet. Qaınatylǵan nemese bótelkedegi sýdy qoldanyp, qaýipsiz ónimderdi tańdap, onyń jaramdylyq merzimin qadaǵalaý kerek. Et jáne et ónimderin belgilengen saýda oryndarynan satyp alyp, barlyq qajetti qujattardyń bolýyna nazar aýdarǵan durys. Et pen balyqty kem degende 2,5 saǵat tolyq termııalyq óńdeýden ótkizgen abzal. Sondaı-aq eresekter men balalar jyl saıyn kontaktili gelmıntoz ben ishek protozoozyna qatysty tekserýden ótip tursa, artyqtyq etpeıdi, - dedi maman.
Eske sala keteıik, budan buryn BQO-da 177 mektepte 440-tan astam oqýshy JRVI-men aýyrǵanyn jazǵan edik.
Sondaı-aq BQO-da 20-dan astam adam búırek sındromdy gemorragııalyq qyzba dertin juqtyrǵan.