Batys Qazaqstanda 3 300-ge jýyq saıajaı úıi sýǵa ketti
ORAL. KAZINFORM — Batys Qazaqstan oblysynda saıajaılarda 3 294 úı sýǵa ketti. BQO TJ departamentiniń baspasóz qyzmetinen málim etkenindeı, sonyń 2 921-i Oral qalasyndaǵy ózen jaıylmalarynda ornalasqan.
«Oblys boıynsha sý tasqyny bastalǵannan beri 13 777 adam evakýatsııalansa, sonyń 5 717-si – balalar. Evakýatsııalyq pýnktterde 2 314 adam turyp jatsa, sonyń 998-i – balalar. 11 463 adam týystaryna ketken. 4 925 mal qaýipsiz jerge aıdaldy. Apattyq-qutqarý jumystaryna 10 519 adam, 1 784 tehnıka, 212 sý sorý quraly, 164 qaıyq jáne 4 tikushaq jumyldyrylǵan», dep habarlady vedomstvodan.
Eske sala keteıik, budan buryn BQO turǵynynyń úılerine aman oralǵanyna shúkirshilik etip otyrǵanyn jazǵan edik.
Jaıyq ózeniniń deńgeıi Oralda 34 santımetrge kóterilip, qaýipti shekke jaqyndady.
