Batys Qazaqstanda 3 300-ge jýyq kıik óleksesi joıyldy
ORAL. KAZINFORM – Batys Qazaqstan oblysynda kıik sanaǵy júrgizildi. Aldyn ala belgili bolǵan málimetke súıensek, óńirde shamamen 1,9-2 mln kıik bar ekeni anyqtaldy. Sanaq qorytyndylary aldaǵy mamyr aıynyń basynda shyǵarylady.
BQO orman sharýashylyǵy jáne janýarlar dúnıesi aýmaqtyq ınspektsııasynyń basshysy Nurlan Rahymjanovtyń óńirlik kommýnıkatsııalar qyzmeti alańynda ótken brıfıngte málim etkenindeı, bıylǵy sanaq qorytyndylary aldaǵy mamyr aıynyń basynda belgili bolady.
Nurlan Saǵyntaıulynyń sózine qaraǵanda, ótken jyly tólin eseptemegende, óńirde 2,3 mln bas aqbóken esepke alynǵan edi.
– Búgingi tańda kıikti qorǵaý jumystaryna «Ohotzooprom» RMQK Batys óńirlik fılıalynyń 4 mobıldi toby, 13 ınspektory jáne 6 tehnıkasy jumyldyrylǵan. Sonyń ishinde úsheýi Batys Qazaqstan, bireýi Atyraý oblysynda jumys istep jatyr. Sondaı-aq reıdtik is-sharalarǵa «Bókeıorda» rezervatynyń 4 mobıldi toby jumyldyrylǵan. Qazirgi ýaqytta kıikterdiń negizgi bóligi Jánibek jáne Kaztalov, ishinara Jańaqala, Bókeı ordasy jáne Aqjaıyq aýdanynda ornalasqan. Inspektorlardyń baqylaýynda shamamen 1,9-2 mln bas kıik bar, – dedi N.Rahymjanov.
Onyń aıtýynsha, BQO ákiminiń orynbasary bekitken «2026-2027 jyldarǵa arnalǵan jabaıy janýarlar (kıikter) qyrylǵan jaǵdaıda olardy anyqtaý, sondaı-aq olardyń ólekselerin joıý kezindegi vedomstvoaralyq is-qımyl josparyna» sáıkes, janýarlardyń ólekseleri mal qorymdarynda, sondaı-aq arnaıy qazylǵan transheıalarda joıylady.
Bókeı ordasy, Jánibek jáne Kaztalov aýdandarynyń aýmaǵynda «Ohotzooprom» jáne rezervat ınspektorlary jergilikti atqarýshy organdardyń qyzmetkerlerimen birlesip, kıikterdiń ólekselerin tabý jáne joıý jumystaryn belsendi júrgizip jatyr. Kúni búginge deıin Batys Qazaqstan oblysy aýmaǵynda barlyǵy 3 281 bas kıik óleksesi joıylsa, sonyń 1 547-si – tekesi, 1 617-si – analyǵy, 117-si – laǵy.
Aýyldyq okrýgterdiń aýmaǵynda ornalasqan mal qorymdarynyń kópshiligi tolyp ketkendikten, ólekselerdi joıý kezinde únemi qıyndyqtar týyndap otyr. Negizgi qıyndyq – arnaıy tehnıkanyń, atap aıtqanda, ekskavatorlardyń jetispeýshiligi.
Kıikterdiń ólekseleri tabylǵan jaǵdaıda «Ohotzooprom» RMQK Batys óńirlik fılıalynyń ınspektorlaryna habarlaý qajettigi týraly jergilikti turǵyndar arasynda turaqty túrde túsindirý jumystary júrgizilip keledi.
– Qazirgi ýaqytta kıikterdiń kúndelikti ólimi kóbeıgeni baıqalady. «Kıikter túrli juqpaly aýrýlardyń taratýshysy bolýy múmkin» degen pikirdiń taralýyna baılanysty halyq arasynda narazylyq artyp keledi. Kıikten alynǵan synamalardyń qorytyndysy boıynsha pasterellez anyqtaldy. Oblys ákiminiń tapsyrmasymen ońtústik aýdandarǵa veterınarııalyq qyzmet basshylary men ınspektsııa qyzmetkerleri shyǵyp, jergilikti jerlerde qalyptasqan jaǵdaıǵa taldaý júrgizdi. Aýmaqtyq ınspektsııa, «Ohotzooprom» RMQK jáne «Bókeıorda» rezervatynyń ınspektorlary atalǵan aýmaqtarda turaqty túrde monıtorıng jumystaryn júrgizip jatyr, – dedi ınspektsııa basshysy.
Taǵy bir másele, kıik kóbeıgendikten, sharýalardyń shabyndyqtary men egistik alqaptaryn qorǵaý jumystary júrgizilip keledi. Bıyl mamyr aıynyń ekinshi onkúndiginen bastap 159 sharýa qojalyǵynyń 66 712 gektar jerin qorǵaý kózdelip otyr.
Oblysta 2023 jáne 2025 jyly kıik sanyn retteý jumystary atqarylǵany belgili. Bul is-sharalar bıyl da jalǵasyn tabady.
Eske sala keteıik, budan buryn Batys Qazaqstanda kıikten pasterellez aýrýy anyqtalǵanyn jazdyq.
